Almatyda jyl basynan beri 28 adam tabıǵı gazdan ýlanǵan

ALMATY. QazAqparat - Almatyda bıyl tabıǵı gazben ýlanýdyń 9 jaǵdaıy tirkelip, odan 28 adam zardap shekti. Bul týraly Óńirlik kommýnıkatsııalar qyzmeti alańynda Almaty qalalyq tótenshe jaǵdaılar departamentiniń Memelekettik órt baqylaý basqarmasy basshysynyń orynbasary, azamattyq qoǵanys podpolkovnıgi Erbolat Tórtqaraev aıtty, dep habarlaıdy QazAqparat tilshisi.

Spıker qys maýsymynda órt pen tabıǵı gazdan ýlaný oqıǵalary jıileıtinin aıtty.

«Bul jaǵdaı júrip jatqan profılaktıkalyq sharalarǵa qaramastan, ókinishke oraı, jylda qaıtalanýda. Jyl basynan beri tabıǵı gazdan ýlaný boıynsha barlyǵy 9 oqıǵa tirkeldi. Ótken jyldyń osy kezeńimen salystyrǵanda 47%-ǵa tómendegeni baıqalady. Tabıǵı gazdan ýlanýdan 28 adam zardap shekti. 2022-2023 jylytý maýsymynda turǵyn úı sektorynda 7 adam kógildir otynnan ýlandy», - dedi E.Tórtqaraev.

Qutqarýshy gaz ballondaryn durys saqtamaý men durys paıdalanbaýdyń saldarynan apattar men qaıǵyly oqıǵalar bolatynyn atap ótti.

«Barlyq ýlaný oqıǵalary jylytý qurylǵylaryn paıdalaný kezinde turǵyndardyń salǵyrttyǵy nátıjesinde oryn alady. Mundaı oqıǵalar kóbinese gaz jabdyqtaryn durys paıdalanbaý, gazdyń shyǵýy, rezeńke shlangtyń tozýy, gaz ballondaryn durys saqtamaý sebebinen oryn alyp jatady. Turǵyndar mezgilinde tazalanbaǵan, murjalarynyń tartýy jetkiliksiz, jasalýy, shyqqan jeri kúmándi gaz jabdyqtaryn paıdalanady», - dedi spıker.

Sondaı-aq TJD ókili Erbolat Tórtqaraev bıyl turǵyn úı sektorynda 350 órt shyǵyp, 29 adam zardap shekkenin aıtty.

Foto: onenergyconsulting.it