Almatyda jyl basynan beri 2 717 jol apaty boldy
ALMATY. QazAqparat - Almatyda jyl basynan beri bolǵan jol apattarynyń saldarynan 2 977 adam zardap shegip, 73-i qaza tapty. Bul týraly Almaty qalalyq polıtsııa departamentiniń jergilikti polıtsııa qyzmeti basqarmasynyń bastyǵy Erjan Uzabaev málim etti, dep habarlaıdy QazAqparat tilshisi.
Polıtseıdiń aıtýynsha, jol apattarynyń basty sebebi – júrgizýshiler men jaıaý júrginshilerdiń jol qozǵalysy erejelerin qasaqana buzýynan.
«Ótken kezeńde jol apatynyń 99,9 %-y nemese 2 614 jol apaty júrgizýshilerdiń kinásinen bolǵan. Júrgizýshilerdiń kinásinen bolatyn árbir besinshi jol apaty manevr jasaý erejelerin saqtamaýdan bolady. Jyl basynan beri osy sebeppen 1 163 jol apaty tirkeldi. Al jyldamdyqty buzý saldarynan 395 jol apaty boldy»,- dedi Erjan Uzabaev.
Jol apaty sanynyń kóshin kólikterdiń bir-birimen soǵysýy bastap tur. Onyń sany - 1 095.
«Jaıaý júrginshilerdi qaǵyp ketý jol apatynyń 38,8%-yn nemese 1018 jol apatyn quraıdy. Onyń saldarynan 1023 adam zardap shegip, 44 adam qaza tapty. Jol qıylysynan ótý erejesiniń saqtalmaýynan 567 jol apaty boldy. Jyl basynan beri jol qozǵalysy erejelerin buzǵany úshin 952 622 jol qozǵalysyna qatysýshy ákimshilik jaýapqa tartyldy»,- dedi Jergilikti polıtsııa qyzmeti basqarmasynyń bastyǵy.
