Almatyda jyl basynan beri 2,6 myń otbasy ajyrasyp ketti

ALMATY. QazAqparat – Bıyl Almatyda 2608 erli-zaıypty ajyrasyp ketti. Bul týraly Óńirlik kommýnıkatsııalar qyzmetinde ótken brıfıngte qalalyq ádilet departamenti basshysynyń orynbasary Záýresh Sathojına aıtty, dep habarlaıdy QazAqparat tilshisi.

Spıkerdiń sózinshe, megapolıste nekege turǵandar sany artty. Máselen, jyl basynan beri 19 367 jup nekesin qıdyrdy.

«2022 jyldyń 8 aıynda Almaty qalasynda 84 507 azamattyq hal aktisi tirkelgen. Bul tizimde 48 200 týý jáne 12 326 ólim aktisi bar. Sonymen qatar, 19 367 neke týraly aktisi esepteldi. Aıta keterligi, 2021 jyly dál osy kezeńde 16 952 adam shańyraq kótergen. Biraq ajyrasý azaıǵan joq, jyl basynan beri 2608 otbasy ajyrasyp ketti. Byltyr 1870 erli-zaıypty nekesin buzǵan bolatyn»,- deıdi Záýresh Sathojına.

Mamandardyń aıtýynsha, ajyrasýdyń basty sebepteriniń biri - týma-týystary men bas qosqan eki adam arasyndaǵy minez qaıshylyǵy.

«Ajyrasýdyń negizgi sebepteri – balanyń bolmaýy, jumysyzdyq, baspanasynyń joqtyǵy, erli-zaıyptylardyń bireýiniń ishimdikke salynýy nemese esirtkige táýeldiligi. Budan bólek, kózge shóp salý bar»,- dep atap ótti Túrksib aýdany ákimi apparatynyń azamattyq hal aktilerin tirkeý bóliminiń basshysy Janna Dıýsembaeva.

Janna Dıýsembaevanyń aıtýynsha, ajyrasýǵa jas jubaılar ǵana emes, egde jastaǵy adamdar da júginedi.

Foto: aldiaargentina.microjuris.com