Almatyda jyl basynan beri 17 Toyota Camry kóligi urlanǵan
ALMATY. QazAqparat – Almatyda Toyota Camry kóliginiń ıeleri urlyq týraly shaǵymdandy. Jyl basynan beri 17 kólik qoldy bolǵan, dep habarlaıdy QazAqparat tilshisi.
Toyota Camry ıeleri arnaıy beınerolık jazyp, úndeý jarııalady.
«Kólik ıelerine aıtarymyz – jaqsy GPS quralyn ornatyńyzdar. Tutas qylmystyq top jumys jasap jatyr. Іshki ister mınıstrligi arnaıy shara qabyldaıdy dep úmittenemiz», - dep jazdy urlanǵan múlik ıeleri.
Qalalyq polıtsııa departamentiniń habarlaýynsha, qyrkúıek aıynan beri 5 Toyota Camry ıesi kóligi urlanǵanyn aıtyp, shaǵym túsirgen.
«17 jeltoqsanda Almaty turǵyny Toyota Camry 70 kóligin bireý aıdap ketkenin habarlady. Kólik ıesi múlikti áıeliniń atyna jazdyrǵan. Keshke úıge qonaqqa kelgen er adamnyń tanysy úı ıesiniń syrtta turǵan kóligin minip, Jambyl oblysy jaqqa shyǵyp ketken. GPS sıgnalynyń arqasynda onyń qaıda ketkenin tabý ońaı boldy», - dedi departamenttiń baspasóz qyzmetinen.
Polıtsııa qyzmetkerleri avtokólik ıelerine sapaly GPS quralyn ornatýǵa keńes berdi.
«Bul sizdiń qaýipsizdigińiz úshin. 11 kólik tabylyp, ıelerine qaıtaryldy. Olardyń basym kópshiliginde GPS dabyl boldy», - dedi polıtsııa departamentiniń baspasóz qyzmetinen.
Foto: s.auto.drom.ru
