Almatyda júıeli qyzyljegimen aýyratyn adamdar úshin alǵashqy mektep ashyldy
ALMATY. QazAqparat - Almatyda № 6 qalalyq emhana janynan júıeli qyzyljegimen aýyratyn adamdardy qoldaýǵa arnalǵan alǵashqy mektep ashyldy.
Ashylý saltanatyna 30-ǵa jýyq naýqas pen olardyń týysqandary, jaqyndary, dáriger mamandar qatysty. Osy mektepti qurý týraly bastama kótergen Almaty memlekettik dárigerler bilimin jetildirý ınstıtýtynyń revmatologııa kafedrasynyń meńgerýshisi Jazıra Omarbekova qazirgi tańda daýasy tabylmaı turǵan dertterdiń biri - qyzyljegimen tolyqqandy ómir súrýge bolatyndyǵyn aıtty.
«Bul mektepti biz naýqastarǵa qoldaý kórsetý úshin ashyp otyrmyz. Munda emdelýshiler óz aýrýlary týraly kóptegen maǵlumat alatyn bolady. Osy syrqatqa shaldyqqan ózge de naýqastarmen, dárigermen tyǵyz baılanys ornatady. Sondaı-aq mektep olardyń týǵan-týystaryna, dostaryna bul aýrýdy jete túsinýge kómektesedi», - dedi AMDBJI revmatologııa kafedrasynyń meńgerýshisi, m.ǵ.k., Almaty qalasynyń bas revmatology Jazıra Omarbekova.
Ashylý saltanatynan keıin-aq bilikti maman naýqastardy qabyldaýdy bastap ketti. Qazir 30-ǵa jýyq naýqas ózderiniń basyna túsken ortaq náýbetpen qalaı kúresý kerektigi jaıly aqyl-keńes tyńdaýda.
Júıeli qyzyljegi aýrýy - sebebi belgisiz kúrdeli dert. Mundaı ataý adam denesinde ash qasqyrdyń tistegenine uqsaıtyndaı qyzyl daqtyń paıda bolýyna baılanysty berilgen. Bul aýrý dárigerlerge 1828 jyldan beri, frantsýz dermatology Biett-tiń teri belgilerin sıpattaǵanynan keıin belgili boldy. Ázirge medıtsına bul naýqastyń daýasyn taba almaı otyr.
Qazaqstanda 100 000 adamǵa shaqqanda 20,6 adam qyzyljegige shaldyqqan eken. Statıstıkaǵa súıensek, elimizde bul syrqatpen aýyratyn 25-64 jastar arasyndaǵy 2800 naýqas tirkelgen.
