Almatyda júrýge berilgen ruqsat merzimi 23 sáýirge deıin uzartyldy
ALMATY.QazAqparat – Almatyda munyń aldynda berilgen ruqsat qujattarynyń merzimi 23 sáýirge deıin jaramdy bolady, dep habarlaıdy QazAqparat tilshisi.
Eske sala keteıik, Tótenshe jaǵdaı men kúsheıtilgen rejım kezinde qalanyń tirshiligine jaýapty keıbir uıymdar men kásiporyndardyń qyzmetkerlerine qalada júrip turýyna 16 sáýirge deıin ruqsat berilgen bolatyn.
Osy maqsatta qalada arnaıy portal ashylǵanyn qala ákiminiń orynbasary Saparbek Tuıaqbaev málimdegen edi.
Aqparat portaly buryn ruqsat berilgen qujattardyń merzimi 23 sáýirge deıin sozylatynyn habarlaıdy.
«Nazar aýdaryńyz! Jedel shtab bekitken infoalmaty.kz derekqory aǵymdaǵy jyldyń 21 sáýirinde jumysyn bastaıdy. Buryn berilgen ruqsattar aǵymdaǵy jyldyń 23 sáýirine deıin jaramdy bolady», - delingen portalda jarııalanǵan aqparatta.
