Almatyda jýrnalısterge «Tolqyn» syılyǵy tapsyryldy
ASTANA. QazAqparat - Astananyń 20 jyldyq mereıtoıyna oraı Almatyda «Qazaqstan Medıa Alıansy» qoǵamdyq birlestigi bekitken radıo habar taratý salasyndaǵy alǵashqy "Tolqyn" syılyǵy tapsyryldy, dep habarlaıdy QazAqparat.
Qazaqstan Medıa Alıansy sáýirde respýblıka aýmaǵynda áýe tolqynynda habar taratatyn barlyq radıostansalar arasynda birinshi kásibı syılyqqa shyǵarmashylyq baıqaý jarııalady.
Konkýrs 12 nomınatsııa - radıojýrnalıstıkanyń barlyq negizgi janrlary (aqparattyq, oıyn-saýyq, mýzykalyq baǵdarlama, reportaj, tok-shoý) boıynsha ótti. Sondaı-aq, basqa da nomınatsııalar: «Radıostansany álgeri damytý», «Efırdegi debıýt», «Úzdik radıodaýys» boldy. «Qazaqstan radıoındýstrııasyn damytýǵa qosqan úlesi úshin» premııasy da jeke taǵaıyndaldy.
Quramyna tanymal jýrnalıster, jetekshi teleradıokompanııalardyń basshylary kirgen qazylar alqasy konkýrsqa jiberilgen 50 shyǵarmashylyq jumyspen tanysyp, on radıostansany jeńimpaz dep tanydy.
Olardyń arasynda - «Astana radıosy», «Radıo NS», «Tengrı FM», «Qazaq radıolary», «Jańa FM», «Classic» radıosy, «Juldyz FM» bar.
«Efırdegi debıýt» arnaıy nomınatsııasyn «Business FM» ıelense, Qazaqstandaǵy jalǵyz balalar radıostansasy «Starkids. FM» «Tyńdarman kózaıymy» atanyp, «Úzdik reportaj» nomınatsııasyn jeńip aldy.
Qazaqstan Medıa Alıansynyń basqarma tóraǵasy Armanjan Baıtasov marapattaý rásimin ashty. Ol medıa-qoǵamdastyqqa osy bastamany usyna otyryp, Qazaqstanda ártúrli jýrnalıstik syılyqtar, marapattar, festıvalder men konkýrstar kóp bolsa da, radıojýrnalıstıka salasynda birde-bir mamandandyrylǵan syılyqtardyń bolmaǵanye atap ótti.
