Almatyda jýrnalıster arasynda «Júrekten júrekke» dep atalatyn respýblıkalyq baıqaý jarııalandy
ALMATY. 8 qarasha. QazAqparat /Názıra Eleýhan/ - Búgin Almatyda A.N.Syzǵanov atyndaǵy ulttyq ǵylymı hırýrgııa ortalyǵy júrek-qan tamyrlary júıesi syrqattarynan kóz jumý deńgeıin tómendetý taqyrybyndaǵy jýrnalıstik jumystarǵa arnalǵan «Júrekten júrekke» atty baıqaý jarııalady.
Atalmysh mekemeniń bas dırektory Jetkergen Arzyqulovtyń aıtýynsha baıqaýdyń maqsaty - qalyń jurtshylyqty júrek aýrýlary men odan týyndaıtyn problemalardan habardar etý, eldegi kardıohırýrgııa, kardıologııa, angıohırýrgııa máseleleri men qazirgi jaı-kúıin buqaralyq aqparat quraldarynda barynsha tolyqqandy ári obektıvti turǵydan kórsetýge, salaýatty ómir saltyn keńirek nasıhattaýǵa yqpal etý, sonymen qatar, Qazaqstanda júrek pen baýyr aýystyrý operatsııalaryna qatysty máselelerdi shynaıy ári kásibı turǵydan kórsetý bolyp tabylady.
Baıqaý úsh atalymnan turady. Konkýrsqa Qazaqstandaǵy baspasóz, radıo, telearnalar men Internet-basylymdarda qazaq jáne orys tilderinde jarııalanǵan jumystar qabyldanady. I atalym -«Baspasózde jarııalanǵan eń úzdik materıal úshin» 1-syılyq - 100 000 teńge, 2-syılyq - 75 000 teńge, 3-syılyq - 50 000 teńge, II -shi «Eń úzdik televızııalyq materıal úshin» atalymyna 1-syılyq - 150 000 teńge, 2-syılyq - 125 000 teńge, 3-syılyq - 100 000 teńge. III atalym -«Radıoefır arqyly nemese Internet-basylymda jarııalanǵan eń úzdik materıal úshin» - 1-syılyq - 75 000 teńge, 2-syılyq - 50 000 teńge, 3-syılyq - 25 000 teńge.
Barlyq materıaldar tómendegi meken-jaı boıynsha qabyladanady: ındeks 050004, Almaty qalasy, Jeltoqsan kóshesi 62-úı, «A.N.Syzǵanov atyndaǵy ulttyq ǵylymı hırýrgııa ortalyǵy» AQ-na. Qujattyń syrtyna konkýrs atalymy kórsetilip, «Júrekten júrekke» baıqaýy komıssııasyna» degen belgi soǵylýy shart. Qujattar 2011 jyldyń 20-qarashasyna deıin qabyldanady. Baıqaý nátıjeleri «Kazakhstan today» aqparat agenttigi men «Interfax Kazahstan» aqparat agenttigi saıtynda jarııalanady.
Baıqaýdyń bas demeýshisi Yumgiskor kompanııasy.
