Almatyda jýrnalıst Gennadıı Bendıtskıımen qoshtasý rásimi ótti

Jýrnalısti baqılyq saparǵa shyǵaryp salýǵa QR Ulttyq ǵylym  akademııasynyń Ǵalymdar úıine áriptesteri, dostary, saıasattanýshy Dosym Sátpaev, QR Parlamenti Májilisiniń depýtaty Artýr Platonov, ekonomıst Oraz Jandosov taǵy basqalar jınaldy.

«Biz dosymyz, baýyrymyzdan aırylyp qaldyq. Osynda turǵan ár adam onymen dos bolǵanyna, birge jumys jasap, birge ómir súrgenine baqytty dep oılaımyn. Qajet kezde kómegin eshqashan aıamaıtyn, ol úshin aqy suramaıtyn. Onyń ómiri quıryqty juldyzdaı qysqa ári mándi, maǵynaly boldy.  Kez kelgen maqalasy ótkir, kúshti bolatyn», - dedi Ratel.kz bas redaktory Marat Asıpov.

Aıta ketý kerek, Gennadıı Bendıtskıı uzaq syrqatynan keıin 3 jeltoqsan -  47 jasqa tolǵan kúni kóz jumdy.

Ol uzaq jyldar boıy KTK arnasynda birneshe aqparattyq-saraptamalyq baǵdarlamalardyń shyǵarýshy redaktory boldy, «Vremıa» gazetiniń avtory, keıin «Chas Bendıtskogo» atty avtorlyq baǵdarlamasyn júrgizdi.  Birneshe jyl buryn óziniń eki áriptesi Marat Asıpovpen jáne Sapa Mekebaevpen birgen jeke aqparattyq-saraptamalyq joba - Ratel.kz portalyn ashty.