Almatyda júrgizýshisi joq avtobýs apatqa ushyrady

ALMATY. QazAqparat – Almatyda júrgizýshisi joq avtobýs óz betinshe artqa qaraı júrip ketip, birneshe kólikti soqty, saldarynan bir adam zardap shekti, dep habarlaıdy QazAqparat tilshisi.

Oqıǵanyń vıdeosy áleýmettik jelide tarady.

Almaty qalalyq polıtsııa departamentiniń málimetinshe, 6 qyrkúıek kúni Abaı dańǵyly men Naýryzbaı batyr kóshesiniń qıylysyna jaqyn jerde № 79-baǵyttaǵy qoǵamdyq kólik jol jıeginde turyp, batys baǵytqa qaraı qozǵalyp, tórt kólikke soǵylǵan.

«Apat saldarynan «Kıa» markaly kóliktiń jolaýshysy dene jaraqatyn aldy. Bul kezde avtobýs júrgizýshi kóliktiń syrtynda bolǵan. Bul derekti Bostandyq aýdandyq polıtsııa basqarmasy óndiriske aldy. Oqıǵanyń mán-jaıy anyqtalyp jatyr»,- dep habarlady Almaty qalalyq polıtsııa departamentiniń baspasóz qyzmetinen.