Almatyda júrgizýshi kýáliginsiz avtokólik aıdaǵan azamat 10 táýlikke qamaldy
ALMATY. QazAqparat – Almaty qalalyq prokýratýrasy men qalalyq polıtsııa departamenti birlesken reıdtiń barysynda júrgizýshi kýáliginsiz avtokólik júrgizgen azamatty anyqtady, dep habarlaıdy QazAqparat tilshisi.
Qalalyq prokýratýranyń baspasóz qyzmetinen habarlaǵandaı, 3 jeltoqsan kúni polıtsııa ekıpajy B. esimdi azamat júrgizgen «Mersedes» markili avtokólikti toqtatady. Tekseris barysynda onyń bıyl 10 qarashada júrgizýshi kýáliginen 6 aıǵa aıyrylǵany anyqtaldy.
«Sol kúni Almaty qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty ony QR ÁQBtK-niń 612-babynyń 3-bóligi boıynsha 10 táýlikke ákimshilik qamaýǵa aldy», - dep habarlady prokýratýrada.
Osyǵan oraı Almaty qalalyq prokýratýrasy avtokólik júrgizýshilerdi jol qozǵalysy erejelerin saqtap, basqa kólik júrgizýshilerge qaýip tóndirmeýge shaqyrdy.
