Almatyda júrgizýshi 11 jastaǵy qyzdy qaǵyp ketti
ALMATY. QazAqparat - Almatydaǵy Dostyq dańǵyly boıynda jeńil avtokólik 11 jastaǵy qyz balany qaǵyp ketti. Bul týraly «QazaAqparat» tilshisine zardap shekken oqýshynyń anasy aıtyp berdi.
«Qyzym sabaqtan soń úıge qaıtyp kele jatqan. Dostyq dańǵylynyń boıynda ornalasqan 48-shi mekteptiń janyndaǵy jaıaý júrginshi jolaǵynda, qyzymdy qara tústi mashına qaǵyp ketti. Rólde áıel adam bolǵan. Ol qyzymdy úsh aıaldama joǵary aparyp, sol jerge tastap ketipti. Tipti jedel járdem de shaqyrmaǵan! Nastıa úıine áreń jetti», - deıdi Alla Parhomenko.
Basynan qatty soqqy alǵan oqýshy qyz qazir aýrýhanada jatyr.
Anasynyń aıtýynsha, oqıǵaǵa kýá bolǵan oqýshylar tek kólikti qara tústi ekenin esterine saqtap qalypty. Atalǵan isti qazir Medeý aýdanynyń jol polıtsııasy tirkeýge aldy.
