Almatyda Júrgenov atyndaǵy Qazaq ulttyq óner akademııasy stýdentteriniń kórmesi ótip jatyr
ALMATY. Naýryzdyń 4-i. QazAqparat / Ádilet Musahaev / - Almatydaǵy QR Sýretshiler odaǵynda, Júrgenov atyndaǵy Qazaq ulttyq óner akademııasynyń «Dızaın jáne dekoratıvti qol óner» fakýltetinde oqıtyn stýdentter jumystarynyń kórmesi ashyldy,
dep habarlaıdy QazAqparat.
Naýryz aıynyń 24-ne deıin jalǵasatyn bul kórmede aǵash pen teriden jasalǵan ydys-aıaqtar, qazaqtyń dekoratıvti mýzyka aspaptary, sonymen qatar kúmisten jasalǵan zergerlik buıymdar, qysh buıymdary, kádesyı zattar men gobelender qoıylǵan.
«Barlyq buıymdar kóne dástúrlik stılde jasalýymen erekshelenip tur. Jańa qol óner sheberleriniń shyǵarmalarymen tanysý Otanǵa, onyń mádenıetine degen súıispenshilik sezimdi nyǵaıta túsedi. Búgingi kórmege qatysýshylarǵa tańdaǵan joldaryna adaldyqty tilegim keledi, óıtkeni olar ǵasyrlar boıy kele jatqan sýret dástúrin jalǵastyrýshylar», deıdi kórme zalynyń dırektory, músinshi- ónertanýshy Elmıra Ahmetova.
