Almatyda júrek aýrýlarynyń emi jaıynda ǵylymı-tájirıbelik konferentsııa ótip jatyr
ALMATY. Mamyrdyń 25-i. QazAqparat /Ádilet Musahaev/ - Búgin Almatyda S.D. Asfendııarov atyndaǵy Qazaq Ulttyq medıtsınalyq ýnıversıtetiniń uıymdastyrýymen «Sońǵy úlgidegi dıagnostıka tehnologııasy jáne ıshemııalyq júrek aýrýynyń emi» taqyrybynda ǵylymı-tájirıbelik konferentsııa ótip jatyr,
dep habarlaıdy QazAqparat.
Atalmysh joǵary oqý ornynyń rektory Aıqan Aqanovtyń aıtýynsha, bul shara ýnıversıtettiń 80 jyldyǵyna oraı ótip otyr. «Respýblıkamyzdyń 5 oblysynda da dál osyndaı sharalar ótkizdik. Onda dárigerlerdi jınap, qazirgi kúngi ózekti máselelerdi kótere otyryp, olardyń bilimin odan ári jetildirý maqsatynda jáne tájirıbemizben bólisý úshin ǵylymı-tájirıbelik konferentsııalar ótkizdik. Al búgingi konferentsııanyń taqyryby óte ózekti másele bolyp otyr, óıtkeni júrek aýrýynyń bul túrimen aýyratyndar 2001 jyly 35 paıyzdy qurasa, qazirgi kúni 43 paıyzǵa jetken», deıdi A.Aqanov.
Shara aıasynda ár aımaqtan kelgen dárigerler júrek, qan aýrýlary jáne olardyń aldyn alý, jańadan shyǵyp jatqan dıagnostıka men em túrleri tóńireginde baıandamalar oqyp, ózara tájirıbe almasýda.
«Sońǵy 2-3 jylda Shymkent qalasynda júrektiń mıokart ınfarktisimen aýyratyndar sany tómendeýde. Onyń sebebi jedel-járdem salasyn jańa avtokóliktermen qamtamasyz etý, brıgadalar sanynyń kóbeıýi, halyqtyń kóp kútpeı tez em alýy men dárigerlerdiń bilimin jetildirý jumystarynyń nátıjesi dep oılaımyn», deıdi Ońtústik memlekettik farmatsevtıka akademııasynyń mamany, professor Seısengúl Qalqabaeva.
Konferentsııaǵa Almaty kardıologııa dıspanserleriniń jáne oblystyq densaýlyq saqtaý ortalyqtarynyń mamandary men Reseı, Ýkraına, Qyrǵyzstan sııaqty elderdiń dárigerleri qatysýda.
