Almatyda jumysy jandanǵan kásiporyndardyń tizimi usynyldy
ALMATY. QazAqparat –Almatyda búginen bastap jumysqa kirisken kásiporyndar sanıtarlyq-epıdemıologııalyq talaptardy qatań saqtaýy tıis, dep habarlaıdy QazAqparat tilshisi.
Búginnen bastap Almatyda ónerkásip kásiporyndary men qurylys nysandary, zańdy tulǵalarǵa arnalǵan HQKO-nyń qyzmeti qaıta iske qosyldy.
«Bul kásiporyndarǵa sanıtarlyq-epıdemıologııalyq qaýipsizdikti qamtamasyz etý talaptary boıynsha aýdıt júrgizildi. Tekserýdi Almaty qalasynyń Kásipkerlik jáne ınvestıtsııalar basqarmasy, taýarlar men kórsetiletin qyzmetterdiń sapasy men qaýipsizdigin baqylaý departamenti jáne «Atameken» UKP qyzmetkerlerinen qurylǵan jumys toby júrgizedi», - dep habarlady ákimdiktiń baspasóz qyzmeti.
Jumysy jandanǵan mekemeler jiti baqylaýǵa alynady. Únemi monıtorıng júrgiziledi. Eger buzýshylyqtar oryn alsa, kásiporynyń jumysyn toqtatý týraly sheshim qabyldanady.
Qaladaǵy barlyq ónerkásip jáne qurylys nysandaryndaǵy jumysshylardy COVID-19 qorǵaý boıynsha is-sharanyń tolyq tizimi jasaldy. Jumys berýshiler qatań sanıtarlyq normalardy saqtaýǵa mindetti.
«Jumysqa kirispes buryn qyzmetkerler medıtsınalyq tekserýden ótedi. Sonymen qatar, olardyń dene qyzýy teplovızor arqyly tekserilip, jýrnalǵa tirkeý qajet. Barlyq qyzmetkerler medıtsınalyq maska, qolǵap, dezınfektsııalyq maılyqtar nemese antıseptıkpen,sanıtaızermen qamtamasyz etilýi tıis. Jınalystardy qysqartyp, adamdardyń kóp shoǵyrlanýyna jol berilmeýi kerek. Sonymen qatar, jumysshylar qashyqtyq normalaryn saqtaýy qajet. Ǵımarat ishi únemi dezınfektsııalanyp turýy shart», - dep atap ótti ákimdik.
Aıta ketý kerek, jedel respıratorlyq ınfektsııalar (dene qyzýy, jótel, murynnyń bitelýi) jáne basqa da juqpaly aýrýlardyń belgisi bar qyzmetkerge jumys isteýge ruqsat etilmeıdi. Bul jaǵdaıda qyzmetkerdi dereý oqshaýlap, jedel járdem brıgadasyn shaqyrýy kerek.
Tıisti aýdıt júrgizgennen keıin kásiporyndardyń karantın jaǵdaıynda jumys isteýge daıyndyǵy týraly qorytyndy shyǵady. Sodan soń qyzmetkerler men kólik quraldary týraly málimetter infoalmaty.kz aqparat bazasyna engiziledi. Al, qalada jumysy jandanǵan kásiporyndardyń tizimin ákimdik saıtynan qaraýǵa bolady.
