Almatyda jumyssyzdarǵa arnalǵan birqatar joba iske qosyldy

ALMATY. QazAqparat - Almatyda «Jastar tájirıbesi», «Birinshi jumys orny», «Kúmis jas» jobasy júzege asyrylyp jatyr. Bul týraly brıfıng barysynda Almaty qalalyq Jumyspen qamtý ortalyǵynyń dırektory Dılıara Imanqulova aıtty, dep habarlaıdy QazAqparat tilshisi.

«Jastar praktıkasy 29 jastan asqan bilim berý uıymdarynyń túlekteri arasynan alǵan mamandyǵy boıynsha jumys ótili 12 aıdan aspaıtyn jumyssyzdarǵa arnalǵan. Eńbekaqyny Jumyspen qamtý ortalyǵy tóleıdi. Bul 122 520 teńge. 2022 jyly 1000 adamdy qamtý kózdelgen», - dedi Almaty qalalyq Jumyspen qamtý ortalyǵynyń dırektory.

Sonymen qatar, ol «Meniń alǵashqy jumys ornym» jobasy týraly aıtty.

«Qazirgi ýaqytta oqý oryndaryn bitirgen túlekter úshin jastar tájirıbesi aıtarlyqtaı qoldaý bolyp tur. Olardy eńbek ótili bolmaǵandyqtan jumysqa almaıdy. Sondyqtan 29 jasqa deıingi jastarǵa, onyń ishinde eńbek ótili joq NEET sanatyndaǵy jastarǵa 18 aıdan aspaıtyn merzimge ýaqytsha jumys oryndaryn qurýdy kózdeıtin «Meniń alǵashqy jumys ornym» jobasy iske qosyldy. Munda da eńbekaqy jumyspen qamtý ortalyǵy arqyly tólenedi. 30 AEK nemese 91 980 teńge»,- dedi spıker.

Sonymen qatar, Almatyda «Urpaqtar úndestigi» jobasy júzege asyrylýda. Ol 2 jyl ishinde oqýyn aıaqtaǵan, jasy 29-dan aspaǵan bilim berý uıymdarynyń túlekterine 6 aıdan aspaıtyn merzimge ýaqytsha jumys oryndaryn ashady.

«Almatylyqtardyń aǵa býynyna keletin bolsaq, olar úshin «Kúmis dáýir» jobasy bar. Ol zeınetkerlik jastaǵy jumyssyzdar úshin 12 aıdan aspaıtyn merzimge ýaqytsha jumys oryndaryn qurýdy kózdeıdi. Jalaqynyń bir bóligin Jumyspen qamtý ortalyǵy óteıdi (eńbekaqydan 50%, biraq 30 AEK-ten aspaıdy). 2022 jyly 633 adamdy jumyspen qamtý josparlanýda, qazirgi ýaqytta jumys berýshiler tizimi jasalýda»,- dedi Dılıara Imanqulova.

Aıta keteıik, búgingi kúni 13460 almatylyq jumyssyz retinde tirkelgen.

https://www.kazinform.kz/kz/almatyda-13-mynnan-astam-adam-zhumyssyz-retinde-tirkelgen_a3933400