Almatyda jumyssyzdardy jańa kásipterge tegin oqytady
ALMATY. QazAqparat - 2 myńnan asa Almaty turǵyny qalanyń iri kompanııalary men ýnıversıtetterinde arnaıy bir salaǵa negizdelgen oqý ortalyqtarynda tegin oqytylady. Bul týraly qalalyq ákimdiktiń baspasóz qyzmeti habarlady.
Jumyssyzdar, ózin ózi jumyspen qamtýshylar, sonymen birge 16 men 29 jas aralyǵyndaǵy jastar 2019 jyldyń aqpan aıynan bastap «Eńbek» nátıjeli jumyspen qamtýdy jáne jappaı kásipkerlikti damytýdyń 2017 - 2021 jyldarǵa arnalǵan baǵdarlamasy aıasynda qysqa merzimdi kýrstarda oqýdy bastaıdy.
«Bıyl biz oqý ortalyqtary men mamandyqtar tańdaýda tolyqtaı jańa tásilder qoldanatyn bolamyz. Biz naryqtaǵy eń úzdik tasymaldaýshylarmen jumys isteýdi josparlap otyrmyz. Qazirgi kezde oqý ortalyqtary tańdaý satysynan ótip jatyr. Aıta ketý kerek, bul oqý oryndary tálimgerlikpen birge dýaldy oqýdy paıdalanýy tıis. Sonymen qatar, zamanaýı materıaldyq-tehnıkalyq bazasy, jumysqa ornalastyrýdyń joǵary deńgeıi bolýy qajet», - dedi Almaty qalasynyń Halyqty jumyspen qamtý ortalyǵy dırektorynyń orynbasary Dáýirbek Abýov.
Jumyspen qamtý ortalyǵy 30 shaqty oqý ortalyǵymen jumys isteıtin bolady. Olardyń jartysy jekemenshik, al qalǵany - memlekettik bolmaq.
«Biz óńirlerdiń erekshelikterin eskerip, eń qajetti mamandyqtardy tańdaı otyryp, olardyń tizimin arttyrdyq. Eger ótken jyly tizimde 32 kásip bolsa, bıyl 48-ge kóbeıip otyr. Eń qajetti mamandyqtardyń úshtigine kiretinder - avtobýs júrgizýshisi, býhgalter jáne aspazshy. Tolyq jańa baǵyttardyń bestigine veb-dızaıner, týrızm jónindegi menedjer, barmen, barısta men gúl ósirýshi jatady. Oqytý 1 aıdan 6 aıǵa deıin jalǵasady. Bul rette, baǵdarlamanyń qatysýshylary 16,7 myń teńge kóleminde shákirtaqy alady. Budan basqa, kýrs aıaqtalǵannan keıin árbir oqý ortalyǵy óz stýdentterin jumysqa ornalastyrýǵa mindetteledi», - dedi Abýov.
Eń qajetti mamandyqtarǵa keńeıtilgen kvota bar. Mysaly, avtobýs júrgizýshisine - 300 oryn, al tas qalaýshyǵa - 40 oryn bar.
«Biz «BI-Group» qurylys kompanııasyna jumysshylar daıyndaıtyn, BI University korporatıvtik ýnıversıtetimen seriktestik jasaýdy josparlap otyrmyz. Seriktes Almaty qalasynyń Jumyspen qamtý ortalyǵy úshin qysqa merzimdi kýrstar aıasynda betonshy, tas qalaýshy men qalypshy daıyndaıtyn bolady. Sonymen birge, biz «Knauf-Gıps Qapshaǵaı» resýrstyq ortalyǵymen jumys isteıtin, Almaty qurylys-tehnıkalyq kolledjimen birge áreket etýge nıettimiz. Knauf-Gıps Qapshaǵaı - bul álemdegi eń iri qurylys materıaldaryn óndirýshi halyqaralyq kompanııa. Olar bizge syrlaýshylar men sylaqshylardy daıyndaıdy. Jalpy alǵanda, biz óndiriste mamandardyń joǵary deńgeıin qamtamasyz etýge jáne jumys berýshilerdiń qajettilikterin qanaǵattandyrýǵa nıettimiz», - dedi spıker.
