Almatyda jumysqa turǵyzý úshin para alǵan zerthana basshysy ustaldy

NUR-SULTAN. QazAqparat - Almatydaǵy veterınarııalyq zerthananyń basshysy qaramaǵyndaǵy qyzmetkerlerden turaqty túrde para alyp kelgen. Bul týraly búgin QR Memlekettik qyzmet isteri jáne sybaılas jemqorlyqqa qarsy is-qımyl agenttigi Qoǵammen baılanys departamentiniń dırektory Arman Berdalın aıtty, dep habarlaıdy QazAqparat tilshisi.

«Sybaılas jemqorlyqqa qarsy is-qımyl ulttyq bıýrosynyń Almaty qalalyq departamenti QR AShM Veterınarııalyq baqylaý jáne qadaǵalaý komıtetiniń «Respýblıkalyq veterınarııalyq zerthana» sharýashylyq júrgizý quqyǵyndaǵy respýblıkalyq memlekettik kásipornynyń Almaty óńirlik fılıaly dırektory men onyń orynbasary - Janýarlar aýrýlaryn dıagnostıkalaý zerthanasynyń meńgerýshisine qatysty sotqa deıingi tergeý júrgizip jatyr», - dedi ol.

Departament basshysynyń dereginshe, olar azamattan jáne fılıaldyń baǵynyshty qyzmetkerlerinen jumysqa ornalastyrý, qyzmette jalpy qamorlyǵy jáne atqaryp otyrǵan laýazymdarynan bosatpaý úshin birneshe ret júıeli túrde jalpy somasy 360 myń teńge para alǵan.

«Kinásin tolyq moıyndaýyna baılanysty kúdiktilerge qatysty protsestik ustaý qoldanylǵan joq. Tergeý jalǵasýda», - dedi Arman Berdalın.