Almatyda jumys istep jatqan elektrık tokqa túsip mert boldy
NUR-SULTAN. QazAqparat - Oqys oqıǵa keshe kúndizgi saǵat 13:40-ta bolǵan. Bul týraly QR ІІM Tótenshe jaǵdaılar komıtetiniń tóraǵasy Vladımır Bekker málim etti, dep habarlaıdy QazAqparat tilshisi.
«Keshe saǵat 13:40-ta Almaty qalasy Medeý aýdanyndaǵy Nazarbaev dańǵyly men Jıenqulov kóshesiniń qıylysyndaǵy toq jelisin tartý beketinde «AJK RES-5» AQ elektromonteryn jumys barysynda tok soǵyp, ol oqıǵa ornynda qaza tapty. Keıin anyqtalǵandaı, ol 1990 jyly týǵan Atashev D.A. atty azamat bolyp shyqty. Búginde ólimge ákelgen tótenshe jaǵdaıdyń saldary tekserilýde. Oqıǵa ornyna 10 tótenshe jaǵdaı qyzmetkeri men 2 tehnıka jumyldyryldy», - dedi V. Bekker ІІM-de ótken baspasóz máslıhatynda.
Sondaı-aq, Tótenshe jaǵdaılar komıtetiniń tóraǵasy dál sol kúni osyǵan uqsas oqıǵanyń Almaty oblysynda da tirkelgenin aıtyp ótti.
«Keshe saǵat 10:15-te Almaty oblysy Alakól aýdany, Úsharal qalasyndaǵy 8 naýryz kóshesinde ornalasqan 57-úıdiń janyndaǵy transformator beketinde jóndeý jumysy kezinde taǵy bir elektromonter tokqa tústi. Zardap shegýshi búginde aýrýhanada jatyr. Jedel tekserý barysynda onyń 1968 jyly dúnıege kelgen Alakól aýdanynda turatyn Japabaev E.T. atty azamat ekeni anyqtaldy. Oqys oqıǵanyń mán-jaıy anyqtalý ústinde. Oqıǵa ornyna 4 tótenshe jaǵdaı qyzmetkeri men bir tehnıka tartyldy», - dedi ol.
Aıta ketsek, buǵan deıin Vladımır Bekker elimizde balalarǵa arnalǵan oıyn attraktsıondary men batýttardyń sanaqqa alynyp jatqanyn aıtyp ótken bolatyn.
