Almatyda júkti kelinshek jol apatynan kóz jumdy
ALMATY. QazAqparat - Almatyda kólik aýdarylyp, 21 jastaǵy aıaǵy aýyr kelinshek jol apatynan kóz jumdy, dep habarlaıdy QazAqparat tilshisi.
Qaıǵyly oqıǵa Momyshuly kóshesi men Jańa jol kóshesiniń qıylysynda bolǵan.
Oqıǵa kýágerleriniń aıtýynsha, Toyota Corolla men Subaru Legacy Momyshuly kóshesimen soltústikke qaraı bara jatqan. Toyota joldyń eń shetinde sol jaqta, al Subaru ortańǵy jolda kele jatqan. Toyota júrgizýshisi aldynda turǵan kedergini kesh baıqap, oń jaqqa qaraı qashpaq bolady. Sol sátte ol Subaru kóliginiń art jaǵynan qaqqan.
Sonyń kesirinen Subaru júrgizýshisi kólik tizgininen aırylyp qalyp, kólik birneshe ret aýdarylyp túsken. Soqqydan jolaýshy, 1997 jylǵy júkti kelinshek kóz jumdy.
Oqıǵanyń mán-jaıyn polıtsııa anyqtap jatyr. Qalalyq ІІD-niń resmı ókili Saltanat Ázirbek qaıǵyly oqıǵaǵa baılanysty túsinikteme berdi.
«Atalǵan derek QR QK 345 babyna sáıkes júrgizýshiniń abaısyzda adam ólimine ákelip soqtyrǵan jol erejesin buzýǵa qatysty sotqa deıingi biryńǵaı tergeý tizilimine tirkeldi. Qazir qajetti saraptama taǵaıyndaldy», - dedi Saltanat Ázirbek.
Aıta ketý kerek, kinási anyqtalǵan jaǵdaıda Toyota Corolla júrgizýshisi 5 jylǵa bas bostandyǵynan aırylýy múmkin.
