Almatyda júkti áıelderdi aýrýhanaǵa qabyldaý algorıtmi túsindirildi
ALMATY. QazAqparat – Almatyda pandemııa kezinde bolashaq analardy aýrýhanaǵa jatqyzý algorıtmi túsindirildi, dep habarlaıdy QazAqparat tilshisi.
Almaty qalalyq Qoǵamdyq densaýlyq basqarmasynyń málimetinshe, epıdemıologııalyq jaǵdaıdy qadaǵalaý maqsatynda júkti áıelder men jańa týǵan nárestelerge PTR ádisimen testileý júrgiziletin bolady.
Júkti áıelder men bosanǵan áıelderge shuǵyl kómek kerek bolǵan jaǵdaıda, PTR testtiń bar-joǵyna qaramastan aýrýhanaǵa jatqyzylady.
«Osy maqsatta qalanyń perzenthanalarynda naýqastar oqshaýlanǵan jaǵdaıda bolatyn ýaqytsha bólimsheler ashylǵan. Medıtsınalyq kómek epıdemııaǵa qarsy rejımdi saqtaı otyryp, tolyq kólemde kórsetiledi. COVID-19 ınfektsııasynyń taralýyn boldyrmaý maqsatynda perzenthana qyzmetkerleriniń ınfektsııalyq qaýipsizdigin saqtaý qamtamasyz etilgen»,– delingen habarlamada.
Shuǵyl aýrýhanaǵa túsken jaǵdaıda PTR ádisimen testileý júrgiziledi, eger nátıjesi teris bolsa, patsıent jalpy bólimge aýystyrylady. COVID-19 ınfektsııasyna oń nátıje kórsetken jaǵdaıda, naýqas juqpaly aýrýlar aýrýhanasyna nemese mamandandyrylǵan perzenthanaǵa aýystyrylady.
Eger jańa bosanǵan áıelde PTR ádisimen testileý nátıjesi oń bolsa, jańa týǵan náreste de tekserýden ótedi. Osy aralyqta PTR ádisimen testileý nátıjesi shyqqanǵa deıin basqa balalarǵa juqpas úshin, náreste ýaqytsha oqshaýlanady. Eger nárestede nátıje oń bolsa, ol anasymen birge emdeledi. Teris bolsa, bala týystaryna beriledi.
Sondaı-aq, Qoǵamdyq densaýlyq basqarmasy turǵyndardy COVID-19 ınfektsııasyn juqtyrýdyń aldyn alý boıynsha mamandardyń keńesine qulaq túrýge shaqyrady.
