Almatyda júkti áıel jedel járdem kóliginde bosandy
ALMATY. QazAqparat - Almatyda júkti áıel jedel járdem kóliginde bosandy. Bul týraly qalalyq qoǵamdyq densaýlyq saqtaý basqarmasy málim etti, dep habarlaıdy QazAqparat tilshisi.
Almatyda júkti áıel tańerteń, saǵat 4:33 shamasynda jedel járdem shaqyrǵan. Aıaǵy aýyr kelinshekti jedel túrde Perınataldyq ortalyqqa jetkizý kerek bolǵan. Biraq aıy-kúni jetip, tolǵaǵy bastalǵan ana perzenthanaǵa jetpeı, medıtsına qyzmetkerleriniń kómegimen jedel járdem kóliginde bosanǵan.
«Teksergennen keıin áıeldiń júktiligi 40 apta ekeni anyqtaldy. Ony dereý perzenthanaǵa jetkizbek boldyq. Biraq patsıentti kólik ishinde bosandyrýǵa týra keldi. Kómekshim Eńlik anaǵa psıhologııalyq qoldaý kórsetti. Al men ony bosandyryp, balanyń kindigin kestim. Sóıtip, ana men balany aman-esen perzenthanaǵa jetkizdik», - deıdi Jedel járdem qyzmeti №10 qosalqy stansasynyń feldsheri Ádiljan Maqsutov.
Jedel járdem qyzmetiniń mamandary óz mindetterin jaýapkershilikpen atqarǵanynyń arqasynda dúnıege salmaǵy 3300 gr, boıy 54 sm qyz bala keldi.
«Kólikte dúnıege kelgen sábı otbasyndaǵy besinshi bala. Eki jyldyq tájirıbemizde mundaı oqıǵa birinshi ret boldy. Árıne, basynda qalaı bolady eken dep alańdadyq. Biraq bar bilimimiz pen tájirıbemizdiń arqasynda anany da, balany da aman-esen jetkizdik», - dedi feldsher Eńlik Bolatbekqyzy.
Jedel járdem qyzmeti dırektorynyń mindetin atqarýshy Parhat Nadyrov jedel járdem qyzmeti úıde bosaný jaǵdaılaryna jıi tap bolatynyn aıtty.
«Jedel járdem qyzmetindegi barlyq maman bilikti. Kez kelgen jaǵdaıda jedel medıtsınalyq kómek kórsetýge daıyn. Degenmen turǵyndar óz densaýlyǵyna salǵyrt qaramaǵany jón. Ásirese, júktilik kezinde», - dedi Parhat Nadyrov.
