Almatyda júkti áıel perzenthanada emes, aýrýhananyń qabyldaý bóliminde bosandy
ALMATY. QazAqparat - Almatyda №7 qalalyq klınıkalyq aýrýhananyń qabyldaý bólimshesiniń dárigerleri medıtsınalyq kómekke júgingen júkti áıeldi bosandyryp aldy, dúnıege ul bala keldi, dep habarlaıdy QazAqparat tilshisi.
Baspasóz qyzmetiniń málimetinshe, Almaty oblysynyń 23 jastaǵy turǵyny tolǵaǵynyń bastalýyna baılanysty Almaty qalasynyń №7 qalalyq klınıkalyq aýrýhanasyna kómekke júgingen.
Oǵan shuǵyl túrde qabyldaý bólimshesinde qajetti mınımaldy tekserý júrgizildi.
Dárigerler analız alyp, ýzıge túsirdi. Perıferııalyq kateter ornatty.
20 mınýttan keıin Qazaqstan Respýblıkasynyń taǵy bir azamaty dúnıege keldi.
Bosanýdy statsıonar gınekologtarynyń kezekshi brıgadasy qabyldady.
Áıeldi bosandyrýdyń barlyq protsesin klınıka reanımatologtary júrgizdi.
«Júkitilik merzimi - 38 apta, bosandyrý shuǵyl túrde boldy. Júkti áıel turǵylyqty mekenjaıynan jyraqta bolýyna baılanysty bizdiń aýrýhanaǵa medıtsınalyq kómekke júgingen. Bul - onyń ekinshi balasy. Aı-kúni tolyq jetken. Áriptesim, doktor Shahlo Abdýjabarova ekeýmiz qabyldaý bólimshesiniń reanımatsııa zalynda bosandyrdyq. Protsess asqynýsyz birqalypty ótti. Ananyń da, balanyń da jaǵdaıy jaqsy. Bala jaryq dúnıe esigin ashty. Bul - baqyt!»,- deıdi áıeldi bosandyryp alǵan №1 gınekologııa bólimshesiniń meńgerýshisi Gúlmıra Jamaeva.
Qazirgi ýaqytta ana men balany jedel medıtsınalyq kómek jáne neonataldy brıgada mamandandyrylǵan medıtsınalyq uıymǵa jetkizdi.
«Sonymen qatar, búginde jetinshi qalalyq aýrýhananyń barlyq medıtsınalyq qyzmetkerleri erekshe jaǵymdy sezimderdi sezinedi, óıtkeni munda balalar kún saıyn dúnıege kelmeıdi, óıtkeni bul perzenthana emes. Jáne ózderiniń áriptesterin maqtan tutady. Búgin olar dárigerlik korporatıvtik chatta áriptesterin sátti ótken bosandyrýmen quttyqtap, anasyna tezirek saýyǵyp ketýin jáne balaǵa «Baýy berik bolsyn» tiledi. Olar tipti balany ózara Qalqaman dep ataý kerek dep qaljyńdady»,- dep atap ótti aýrýhananyń baspasóz qyzmeti.
