Almatyda júk kólikteri soqtyǵysyp, bir adam jaraqat aldy
ALMATY. QazAqparat - Almatynyń Rysqulov dańǵylynda Foton men Gazel júk kólikteri soqtyǵysyp, saldarynan júrgizýshiniń biri jaraqat aldy, dep habarlaıdy QazAqparat tilshisi.
Kólik apaty Rysqulov dańǵylynyń boıynda Jansúgirov kóshesine jaqyn tusta bolǵan.
Oqıǵa kýágerleriniń aıtýynsha, ortańǵy qatarda «Gazel» júk kóligi, sol jaǵynda onymen qatarlas Volkswagen avtokóligi batysqa qaraı baǵyt alyp kele jatqan.
Kenet Gazeldi artynan qatty jyldamdyqpen Foton júk kóligi kelip soǵady. Soqqydan Gazel sol jaq qatarǵa syrǵyp, Volkswagendi syryp ketedi. Apat saldarynan Foton júk kóliginiń júrgizýshisi jaraqat alyp, aýrýhanaǵa jetkizildi.
Qazir polıtsııa jol-kólik oqıǵasynyń mán-jaıyn anyqtaýǵa kiristi.
