Almatyda júk kóliginiń tirkemesi jaıaý júrginshiler ótkeline tirelip qaldy

ALMATY. QazAqparat – Almatyda júk kóliginiń tirkemesi jaıaý júrginshiler kópirine soǵylyp, jol qozǵalysyna kedergi keltirdi, dep habarlaıdy QazAqparat tilshisi.

Oqıǵa búgin saǵat 14:50-de Rysqulov dańǵyly boıynda boldy. Bul týraly Almaty qalalyq polıtsııa departamenti Anyqtaý basqarmasynyń bastyǵy Oljas Sháripov málimdedi.

«Tirkemesi bar «Volvo» kóliginiń júrgizýshisi A. esimdi azamat Rysqulov dańǵylymen batys baǵytta kele jatyp, jaıaý júrginshiler ótkeline soǵylady. Kópir qurylymy zaqymdaldy. Materıaldy Jetisý aýdandyq polıtsııa basqarmasynyń qyzmetkerleri tirkedi. Oqıǵanyń mán-jaıy anyqtalyp jatyr», - dep habarlady Oljas Sháripov.

Aıta keteıik, jol apatynyń vıdeosy áleýmettik jelide tarady.

Vıdeodan alynǵan kadr / youtube.com/@kazinform