Almatyda júk kóligin ótkizip jibermek bolǵan eki mashına soqtyǵysyp qaldy
ALMATY. QazAqparat - Almatydaǵy júk kóligin dańǵylǵa shyǵarý úshin jol bermek bolǵan kezde eki mashına soqtyǵysyp qaldy, dep habarlaıdy QazAqparat tilshisi oqıǵa ornynan.
Jol apaty T.Rysqulov dańǵylynyń boıynda І.Jansúgirov jáne Á.Bókeıhanov kósheleriniń arasynda batys baǵytqa qaraı qoımalar mańynda bolǵan.
Tóbesine deıin júk tıelgen júk kóligi T.Rysqulov dańǵylyna burylyp shyqpaq bolady. Júk tıeýshilerdiń biri jolda ketip bara jatqan júrgizýshilerden toqtap, júk kóligin ótkizip jiberýin suraǵan.
Júk kóligi júrgizýshisiniń aıtýynsha, 1-shi jáne 2-shi jolaqtaǵy kólikter toqtaǵan. Honda Odyssey úshinshi qatarmen kele jatyp, birden tejegishti basady. Onyń artynda kele jatqan Lada kóligi aıaldamastan, qatty jyldamdyqpen kelip Hondaǵa soǵylady.
Jol apatynan 4 adam zardap shekti. Onyń úsheýi Honda jáne bireýi «Ladanyń» jolaýshysy. Barlyǵy aýrýhanaǵa jetkizildi. Polıtsııa apatqa kinálini anyqtap jatyr.
