Almatyda júk kóligi jolaýshylar avtobýsyna soǵyldy
ALMATY. QazAqparat - Júk kóligi men avtobýstyń soqtyǵysýy saldarynan eki stýdent zardap shekti, dep habarlaıdy QazAqparat tilshisi.
Jol-kólik oqıǵasy Súıinbaı dańǵyly boıynda bolǵan. Ońtústik baǵytta júrip kele jatqan № 29 avtobýs salonynda negizinen stýdentter bolǵan. Jaıaý júrginshini ótkizý úshin belgilengen jolaq aldyna avtobýs jáne taǵy da úsh jeńil avtokólik qatar toqtaǵan. Kenetten avtobýsqa júk kóligi kelip soqtyǵysady. Osynyń saldarynan jolaýshylardyń barlyǵy salon ishinde otyrǵan oryndarynan qulap túsip, eki stýdent zardap shekti.
Belgili bolǵandaı, zardap shekken stýdetter saǵat 11 kezinde Almaty kópsalaly klınıkalyq aýrýhanasyna jetkizildi. Dárigerlerdiń tekserýinen keıin stýdetter ambýlatorlyq emdelýge úılerine jiberildi. Olar jol apaty kezinde aýyr jaraqat almaǵany anyqtaldy.
Qazirgi kezde JKO boıynsha polıtsııa tarapynan tekserý júrip jatyr.
