Almatyda júk kóligi aǵashqa soǵyldy
ALMATY. QazAqparat - Almatynyń ortalyǵyndaǵy kóshelerdiń qıylysynda júkti ózdiginen aýdaratyn kólik talǵa soǵyldy, dep habarlaıdy QazAqparat.
Jol apaty Jeltoqsan jáne Gogol kósheleriniń qıylysynda bolǵan. Honda CRV kóligi júrgizýshisiniń aıtýynsha, ol soltústik baǵytta kele jatyp, birjaqty Gogol kóshesiniń boıymen shyǵysqa qaraı ońǵa burylmaqshy bolǵan. Alaıda júk kóligi Jeltoqsan kóshesiniń boıyndaǵy shetki oń jaq qatardaǵy avtobýs jolaǵymen tike júrip bara jatqan. Muny baıqaǵan avtokólik júrgizýshisi dereý toqtap, ekinshi kólikti ótkizbekshi bolǵanmen, júk kóligi avtokóliktiń oń jaq qanatyn syzyp ótip, joldyń sol jaq bóliginde turǵan aǵashqa soǵylǵan.
Júkti ózdiginen aýdaratyn kóliktiń júrgizýshisi avtobýs jolaǵymen emes, ózine tıesili oń jaq jolaqpen júrgenin aıtady. Dál sol sátte onyń aldynda kele jatqan Honda avtokóligi tejegishin basyp, jyldam toqtaı bastaǵan. Júk kóligi Honda-ǵa soǵylyp qalmas úshin bos turǵan jolaqqa shyǵyp ketýge májbúr bolǵan, alaıda avtokóliktiń júrgizýshisi de dál solaı ońǵa buryla bastaǵan sátte júk kóligi jeńil kóliktiń oń jaq qanatyna tıip ketedi.
Oqıǵa ornyna kelgen jedel járdem qyzmetkerleri júrgizýshilerdi tekserdi. Alaıda ekeýi de aýrýhanaǵa barýdan bas tartty. Polıtseıler birneshe saraptama taǵaıyndap, oqıǵanyń mán-jaıyn anyqtaý úshin beınebaqylaý kameralarynyń kómegine júginedi.
