Almatyda júgensiz júrgizýshilerdiń «qara tizimi» jasaldy

ALMATY. QazAqparat - Almatyda Jolaýshylar kóligi kásiporyndarynyń qaýymdastyǵy júrgizýshilerdiń bazalyq eńbekaqysyn esepteý tásilin oılap tapty, dep habarlaıdy QazAqparat tilshisi.

«Júrgizýshilerdiń bazalyq eńbekaqysyn biryńǵaı esepteý ádistemesi jasaldy. Ol saǵattyq bazalyq jalaqydan, qosymsha tólemnen, túngi ýaqyttaǵy ári mereke kúndergi jumys úshin aqydan jáne syıaqydan turady. Syıaqy jalaqynyń 25-50 paıyzyn quraıdy», - dedi qalalyq Mobıldilik basqarmasynyń basshysy Saǵyndyq Telibaev Qoǵamdyq keńestiń otyrysy barysynda.

Onyń aıtýynsha, avtobýs júrgizýshileriniń ortasha jalaqysy 198 myń teńge bolyp otyr. Bul rette, 2018 jyldyń sońǵy toqsany men 2019 jyldyń basynda mamandardyń biliktiligin arttyrý ortalyǵynda 415 júrgizýshi qaıta oqýdan ótken. Sondaı-aq, 2110 adam jolda júrý jáne jolaýshylardy tasymaldaý erejelerin bilý, alǵashqy medıtsınalyq kómek kórsetý alý deńgeıine test tapsyrdy.

Basqarma mamandary júrgizýshilerdiń esep reestrin jasap qoıǵan. Bazaǵa 3416 júrgizýshiniń jumys orny, eńbek ótili, quqyqbuzýshylyqtary týraly derekter, aıyppuldary, jolaýshylardyń pikirleri jáne taǵy basqa málimetteri engizilgen. Sonyń nátıjesinde júrgýshilerdiń reıtıngi qurylyp, «qara tizimi» jasalady.

Saǵyndyq Telibaevtyń aıtýynsha, qalada 957 aıaldama pavılony ornalasqan.

BRT jelisimen aıaldama pavılondarynda 8 elektrondy tablo ornatylǵan. Bul tablolardan avtobýstardyń aıaldamalaryn kórip otyrýǵa bolady.