Almatyda JRVI jáne tumaýmen syrqattanǵandardyń sany ósti
ALMATY. QazAqparat - Almaty qalasynda JRVI jáne tumaýmen syrqattanýshylyqtyń maýsymdyq ósýi baıqalady. Bul týraly Almaty qalasynyń sanıtarııalyq-epıdemıologııalyq baqylaý departamentinde málim etti, dep habarlaıdy QazAqparat tilshisi.
Vedomstvonyń málimetine sáıkes, ótken aptada qalada JRVI-diń 17 739 jaǵdaıy tirkeldi. Bul onyń aldyndaǵy aptadaǵy kórsetkishten 13,1%-ǵa joǵary jáne ótken jyldyń uqsas kezeńindegi kórsetkishten 2,9 esege joǵary. Sondaı-aq aýrýdyń 64,1%-y balalar arasynda tirkeldi.
«Megapolıste maýsymdyq tumaýdyń úsh túri, onyń ishinde A tıpti tumaýdyń eki túri (A/H3N2, A/H1N1 pdm09) jáne V tıpti vırýstary aınalymda júr. Sonymen qatar, basqa da JRVI aılanymda birge júr, onyń ishinde RS vırýsy, bokavırýs, rınovırýs jáne maýsymdyq koronavırýs. Aıta ketý kerek, tumaýdyń aldyn alýdyń eń tıimdi ádisi – ýaqtyly vaktsınatsııa. Tumaý vırýsy jyl saıyn mýtatsııaǵa ushyraıdy, sondyqtan tumaýǵa qarsy vaktsınany jyl saıyn epıdemııaǵa deıingi maýsymda (qazan-qarasha aılary) tek aǵymdaǵy jylǵy vaktsınamen alý kerek. Vaktsınatsııadan keıin ımmýnıtet 14 kúnnen keıin qalyptasady jáne maýsym boıy saqtalady (1 jylǵa deıin)», - dep habarlady Almaty qalasynyń sanıtarııalyq – epıdemıologııalyq baqylaý departamentiniń baspasóz qyzmetinde.
