Almatyda JRVI-men syrqattanýdyń maýsymdyq ósýi baıqaldy

ALMATY. QazAqparat- Almatyda bir aptada 28 586 jedel respıratorly vırýsty ınfektsııasy tirkeldi. Bul týraly Óńirlik kommýnıkatsııalar qyzmetinde ótken brıfıngte qalalyq sanıtarlyq-epıdemıologııalyq baqylaý departamentiniń basshysy Qasymhan Alpysbaıuly málim etti, dep habarlaıdy QazAqparat tilshisi.

Megapolıstegi epıdemıologııalyq jaǵdaıǵa toqtalǵan SEBD basshysy qalada jiti respıratorlyq vırýstyq ınfektsııalardyń maýsymdyq ósýi baıqalǵanyn atap ótti.

«Máselen, ótken aptada JRVI-diń 28 586 jaǵdaıy tirkeldi. Onyń 18649-y bala. Zerthanalyq monıtorıngke sáıkes, qalada rınovırýstar, RS vırýsy, paragrıpp vırýsy jáne maýsymdyq koronavırýs sııaqty jedel respıratorlyq vırýstyq ınfektsııalar taralǵan»,- dedi departament basshysy

Sonymen qatar, ol epıdemııalyq maýsymda aınalymda tumaý vırýsynyń A (H1N1), A (H3N2) jáne V tıpti shtamdary ózekti bolatynyn aıtty.

«Sondyqtan tumaýdyń aldyn alýdyń eń tıimdi ádisi - der kezinde oǵan qarsy vaktsına alý. Tumaý vırýsy jyl saıyn mýtatsııaǵa ushyraıdy, sondyqtan tumaýǵa qarsy vaktsınany jyl saıyn epıdemııaǵa deıingi maýsymda qazan-qarasha aılarynda tek aǵymdaǵy shyǵarylǵan jylǵy vaktsınamen ǵana alý kerek», - dep keńes berdi Almaty qalasynyń bas sanıtar dárigeri.

Aıtýynsha,vaktsına alǵannan keıin ımmýnıtet 14 kúnnen keıin qalyptasyp tek qana maýsym boıy saqtalady (1 jylǵa deıin). Qaýipsiz jáne tıimdi vaktsınalar qoljetimdi jáne 60 jyldan astam ýaqyt boıy qoldanylyp keledi.

Buǵan deıin Almatyda tumaýǵa qarsy vaktsınanyń 200 myńnan astam dozasy satyp alynǵany týraly jazǵan bolatynbyz.