Almatyda JOO-lardyń sybaılas jemqorlyqqa qarsy monıtorıng júıesi ázirlendi
Monıtorıng júıesi respýblıkadaǵy jetekshi ýnıversıtettiń jalpy 16 myńnan astam stýdentteri men oqytýshylaryn qamtyǵan. Monıtorıng ádisnamasy «Oqytýshy stýdentterdiń kózimen», «Oqytýshy áriptesterdiń kózimen», «Stýdentterdiń qanaǵattanýyn baǵalaý», «Ýnıversıtet túlekterdiń kózimen», «Sybaılas jemqorlyqty qabyldaý ındeksi» sııaqty jappaı jáne iriktelgen suraq-jaýaptarǵa negizdelgen saýalnamalar serııasyn qamtıdy. Olar JOO-daǵy sybaılas jemqorlyqqa qarsy saıasattyń jaı-kúıin jáne tıimdiligin baǵalaýdyń biryńǵaı júıesin quraıdy.
Ál-Farabı atyndaǵy QazUÝ-dyń «Sybaılas jemqorlyqtan tys ýnıversıtet» atty jobasynyń aıasynda jeti jyl boıy qalyptastyrylǵan praktıkalyq ázirlemeleri oǵan negiz boldy. Atalmysh jobany júzege asyrý ýnıversıtettiń barlyq salalarynda jemqorlyqqa qarsy tehnologııalar keshenin engizýdi jáne olardyń tıimdiligin únemi baǵalaýdy qamtamasyz etti.
«Sybaılas jemqorlyqqa qarsy is-qımyl monıtorıngi júıesi stýdentter men oqytýshylar turǵysynan sybaılas jemqorlyqty qabyldaý ındeksin anyqtaýǵa múmkindik beredi. Ol oqytýshylardyń korporatıvtik mádenıet normalary men kásibı qundylyqtardy ustanýy, bilim berý jáne oqý-tárbıe úderisiniń ashyqtyǵy, oqý jetistikterin baǵalaýdyń obektıvtiligi jáne akademııalyq shynaıylyq, kórsetiletin qyzmet sapasy deńgeıimen qanaǵattaný dárejesi jáne joo ortasynda josyqsyz praktıkalardyń taralýy sııaqty mańyzdy parametrler boıynsha baǵalaýdy qamtıdy», - delingen habarlamada.
Aýqymdy zertteýlerdiń qorytyndysy boıynsha fakýltetter men kafedralardyń sybaılas jemqorlyqqa qarsy reıtıngisi jasaldy, onyń nátıjeleri QazUÝ Ǵylymı keńesiniń otyrysynda keńinen talqylandy. «SANALY URPAQ» jobalaý ofısiniń basshysy Qaıyrjan Toqýshev atap ótkendeı, mundaı áleýmettik zertteýler barlyq joǵary oqý oryndarynda júrgizilýi tıis, óıtkeni bul sybaılas jemqorlyqtyń aldyn alý jáne oǵan qarsy kúres boıynsha naqty sharalardy ýaqytyly qalyptastyrýǵa kómektesedi. Jobalaý ofısi monıtorıng júıesi men ony ótkizý tájirıbesin Almatydaǵy barlyq JOO-larǵa sybaılas jemqorlyqqa qarsy is-qımyldardy zertteý jáne paıdalaný úshin usynatyn bolady.
Aıta keterligi, «SANALY URPAQ» jobalyq ofısi kóktemde ál-Farabı atyndaǵy Qazaq ulttyq ýnıversıteti negizinde Memlekettik qyzmet isteri jáne sybaılas jemqorlyqqa qarsy is-qımyl agenttiginiń bastamasymen ashylǵan. Agenttiktiń tóraǵasy Alık Shpekbaev, Almaty qalasynyń ákimi Baýyrjan Baıbek jáne ál-Farabı atyndaǵy QazUÝ-dyń rektory Ǵalym Mutanov bilim berý salasyndaǵy sybaılas jemqorlyqqa qarsy is-qımyl tetikterin engizý týraly úsh jaqty kelisimge qol qoıǵan bolatyn.