Almatyda jóndeýden ótken Voznesen kafedraldy shirkeýi ashyldy
Bir ǵasyrlyq tarıhy bar ǵımaratty qaıta qalpyna keltirýge 2 mlrd teńge qarajat ketti. Bul qarjyny qarapaıym halyq pen bıznes qaýymdastyq jınap berdi.
Restavratsııalyq jumystar 2017 jyldyń jazynda bastaldy.
Shirkeýdi duǵa oqyp, lıtýrgııa rásimin jasaýǵa Astana jáne Qazaqstan mıtropolıti Aleksandr, Shyǵysamerıkalyq jáne Nıý-Iorktik Illarıon keldi.
«Shirkeýdiń ashylýy - biz úshin mańyzdy oqıǵa. Dáripteý rásimi shirkeýdiń qaıtadan halyqqa esik ashyp, ǵıbadat bastalǵanyn bildiredi. Bolashaqta bul jerde hrıstıan qyzmeti júrsin dep búgin arnaıy duǵa oqylyp jatyr», - deıdi protoıereı, Qazaqstan mıtropolıt okrýginiń shirkeý men qoǵam qarym-qatynasy bóliminiń tóraǵasy Aleksandr Sývorov.
Onyń aıtýynsha, shirkeýdiń ishi avtordyń qalaýymen ózgertildi.
«Tarıhı qujattardy zerttep shyqtyq. Óte aýqymdy joba boldy. Boıaýlardyń túsine deıin qaraldy. Buǵan deıin de bul shirkeýge restavratsııa jasalǵan. Alaıda bul joly avtorlardyń ıdeıasy tolyǵymen júzege asty dep oılaımyn», - dedi ol.
Shirkeýdi qaıta jóndeýge Reseı, Frantsııa, Germanııa sýretshileri atsalysty.
Mamandar kóne sáýletshilerdiń ıdeıasyna nuqsan keltirmeı, úzdik tehnologııalardy qoldandy.
«Tehnıkalyq problemalar kóp boldy. Qazaqstanda ondaı kúrdeli máseleni sheshetin maman tappadyq. Berlınnen maman aldyrdyq. Ǵımarattyń aldyńǵy jaǵyndaǵy munaralaryn aýystyrý eń qıyn problema boldy. Bul jumystarǵa tas qashaýshy, sýretshi, aǵash sheberi, jalpy alǵanda 2 myńǵa jýyq adam qatysty», - dedi Aleksandr.
Protoıereı Aleksandr Sývorov shirkeýdiń landshaft dızaınynyń taqyrypqa saı bolýyna basa mán berilgenin aıtty.
«Shirkeýdi salar kezde bul saıabaq Pýshkınskıı dep atalǵan bolatyn. Sondyqtan, Sankt-Peterbordan Pýshkın stılindegi arnaıy shamdar aldyryldy. Aınalaǵa kespetas tóseldi», - dedi ol.
Búgingi shirkeýdiń ashylýyna hrıstıan dininiń pravoslav baǵytyn ustanatyn adamdar jınaldy.
Almatydaǵy Voznesen shirkeýi – aǵashtan soǵylǵan álemdegi eń bıik pravoslav shirkeýiniń biri. Konstrýktsııasynyń bıiktigi 54 metrge jetetin bul ǵımaratty 1904-1907 jyldary Andreı Zenkov salǵan. Tutas aǵash bólshekterden jasalǵan shirkeý 1910 jylǵy jer silkinisinen soń qıramaı aman qaldy. Munda bir ýaqytta 1800 adam qulshylyq jasaı alady.
