Almatyda jolǵa talasyp jaǵa jyrtysqandar ustaldy
ALMATY. QazAqparat - Seıfýlın men Jansúgirov kósheleriniń qıylysynda jolǵa talasqan júrgizýshiler ózara tóbelesken vıdeo ǵalamtorǵa jarııalanǵan edi. Janjal artta kele jatqan kóliktiń vıdeotirkeýishine túsip qalǵan.
Vıdeo avtorynyń aıtýynsha, artqy kólikten túsken 4 jigit ózge kóliktegi eki jigitti jerge qulatyp alyp, soqqyǵa jyqqan. Olardyń biri sol jerde es-tússiz qalǵan.
Qalalyq ІІD bolǵan oqıǵaǵa qatysty túsinikteme berdi. Jetisý aýdandyq ІІB basshysy Ramıl Túsipovtyń aıtýynsha, bul oqıǵa boıynsha QR QK 293 babynyń 2 bólimimen (buzaqylyq) tergeý júrip jatyr.
Qazirgi tańda oqıǵaǵa qatysty tórt jigit ustalǵan.
«Bul qylmys týraly áleýmettik jelilerden bildik. «102» nómirine eshqandaı aryz kelmedi. Anyqtalǵandaı, eki kólik birine biri jol bermegen. Onyń arty tóbeleske ulasyp, saldarynan bir adam qatty soqqyǵa jyǵylǵan. Qazir japa shekken adam aryzdandy», - dedi Jetisý aýdandyq ІІB basshysy Ramıl Túsipov.
