Almatyda jolǵa talasqan júrgizýshiler apatqa ushyrady
ALMATY. QazAqparat - Almaty qalasyndaǵy eki kósheniń qıylysynda eki jol-kólik oqıǵasy tirkelip, saldarynan eki adam zardap shekti, dep habarlaıdy QazAqparat tilshisi.
Eki jol-kólik oqıǵasy da Almaty qalasyndaǵy Jeltoqsan jáne Maqataev kósheleriniń qıylysynda bolǵan.
Birinshi jaǵdaıda Audi avtokóligi birjaqty Maqataev kóshesimen batys baǵytqa kele jatsa, Jeltoqsan kóshesi boıymen Daewoo soltústik baǵytta qozǵalǵan. Dál kósheniń qıylysyna kelgende júrgizýshiler bir-birine jol bermeı, aqyry soqtyǵysyp tynǵan.
Arada kóp ótpeı, Jeltoqsan boıymen kele jatqan Camry Maqataev kóshesimen qozǵalǵan Galant kóligimen soqtyǵysqan.
Kýágerlerdiń aıtýynsha, jol-kólik oqıǵalary barysynda baǵdarshamdar sónip turǵan. Osynyń saldarynan eki jaǵdaıda da júrgizýshiler basty jol qaısysy, qosaly jol qaısysy ajyrata almaǵan bolýy kerek.
Eki jaǵdaıda eki adamnyń zardap shekkeni belgili bolyp otyr.
