Almatyda jolǵa talasqan azamat jedel járdem júrgizýshisin soqqyǵa jyqty
ALMATY. QazAqparat - Almatyda júrgizýshi jedel járdem júrgizýshisin soqqyǵa jyqty. 13 jyldan beri jedel járdemde jumys isteıtin Nıkolaı Kýchma ashýshań júrgizýshini jazasyz qaldyrmaýǵa bekingen, dep habarlaıdy QazAqparat tilshisi.
Atalǵan vıdeo búgin Feısbýk jelisinde jarııalandy. Beınekadrda Folksvagen Passat júrgizýshisiniń jedel járdem karetasy júrgizýshisin soqqyǵa jyqqany kórinip tur.
Nıkolaı Kýchmanyń aıtýynsha, oqys oqıǵa búgin Maqataev kóshesinde oryn alǵan.
«Bizdiń teketiresimiz Naýryzbaı jáne Abylaıhan kóshelerinde bastalǵan. Men Folksvagenmen jolǵa talasyp qaldym. Biz shamamyz jetkenshe naýqastardy tez jetkizýge tyrysamyz. Sol kezde ol meniń aldymdy eki ret kesip, balaǵattap ketti. Sosyn avtobýs jolyna shyqqanda, aldyma kóligin kese kóldeneń qoıyp qoıdy. Kólikten túse sala meni ura bastady. Sonyń nátıjesinde qabaǵym jyrtylyp, jabyq mı jaraqatyn aldym. 3-4 jerinen tikti», - dedi Nıkolaı Kýchma.
Oqys oqıǵany feldsher Gúlsim Rahımova vıdeoǵa túsirip alǵan.
«Biz 46 jastaǵy áıeldi jedel trombozben aýrýhanaǵa alyp bara jattyq. Oǵan shuǵyl ota qajet edi. Naýqasty alyp bara jatqanda Maqataev pen Naýryzbaı kósheleriniń qıylysynda avtobýs jolaǵynda osyndaı oqıǵa boldy. Men júrgizýshiniń jaraqatyn tańyp, arttaǵy naýqastardy tynyshtandyrdym», - dedi №6 «podstansanyń» feldsheri Gúlnar Rahımova.
Jedel járdem stasasynyń bas dárigeri Sábıt Pazılovtyń aıtýynsha, mundaı oqıǵalar jylyna úsh-tórt ret kezdesedi.
«Jedel járdem qyzmetkerleriniń ómiri men densaýlyǵyna jylyna 3-4 ret qaýip tónedi. Jedel járdem qyzmeti naýqastardy aýrýhanaǵa der kezinde jetkizýge tyrysady. Búgin Maqataev kóshesinde oqys oqıǵa oryn aldy. Sol maqsatpen shuǵyl ketip bara jatqan jedel járdem júrgizýshisi soqqyǵa jyǵyldy. Jedel járdem kólikterin ádeıi saryǵa boıadyq. Sonda da júrgizýshiler arasynda tártipsizdikter jıi kezdesedi», - dedi Jedel járdem stansasynyń bas dárigeri Sábıt Pazılov.
Onyń aıtýynsha, byltyr naýqasqa kómekke barǵan reanımatolog dárigerdi er adam basynan kirpishpen urǵan. Qazir bul dáriger uzaq emdeýden soń jumysyna qaıta kirisken.
Aıta ketý kerek, týra osyǵan uqsas oqıǵa keshe Túrksib aýdanynda da oryn alǵan. Jedel járdem kóligi Shılov kóshesimen kele jatqanda bir top mas adam kólikke kedergi bolǵan. Olardyń ishinen bir er adam kóliktiń artqy bóligine kirpish laqtyrǵan. Sonyń saldarynan kóliktiń artqy bóligi maıysyp qalǵan.
