Almatyda joldyń qarsy betine shyqqan kólik júrgizýshisi qamaýǵa alyndy
Almatyda jol erejesin qasaqana buzǵan er adam anyqtaldy. Bul –1997 jyly týǵan T. esimdi azamat. Almaty oblysynyń turǵyny.
Jol júrý erejesin óreskel buzǵan júrgizýshi bes táýlikke qamaýǵa alyndy. Sonymen qatar, 155 myń teńge kóleminde aıyppul tóleıdi.
«Quqyq buzýshynyń jolaýshysy túsirgen kadrlarda barlyǵy anyq kórsetilgen. Árıne, jolda mundaı is-áreketke jol berilmeıdi. Qarbalas kóshe boıymen qarsy jolaqqa shyǵýmen qatar, júrgizýshi baǵdarshamnyń tyıym salynǵan dabylyna ótip ketken, saqtandyrý polısi joq, avtokóliktiń áınekteri qarańǵylanǵan, apattyq jaǵdaı týǵyzyp, tirkeýden sheshilgen kólik quralyn basqarǵan. Sonymen qatar, júrgizýshiniń áreketi usaq buzaqylyq retinde qarastyrylady. Almaty qalasynyń mamandandyrylǵan aýdanaralyq ákimshilik sotynyń sheshimimen quqyq buzýshy bes táýlikke qamaýǵa alyndy. Aıyppuldyń jalpy somasy 155 myń teńge. 11 ákimshilik hattama toltyryldy, – dedi Almaty qalalyq PD jergilikti polıtsııa qyzmeti basqarmasynyń bastyǵy Manap Sattarov.
