Almatyda joldyń qarsy betine shyǵyp ketken júrgizýshi jazaǵa tartyldy
ALMATY. QazAqparat - Almatyda qarsy baǵytpen júrgen kólik júrgizýshisi kýáliginen aıyryldy, dep habarlaıdy QazAqparat tilshisi.
Almaty joldarynda apattyq jaǵdaı týǵyzǵan «Mersedes-220» kólik júrgizýshisi taǵyz kólik aǵynynan shyǵyp, qarsy jolaqta qozǵalýdy jalǵastyrdy. Ony sol kóliktiń jolaýshysy uıaly telefon kamerasyna túsirgen. Beınejazbadan júrgizýshi Nemırovıch-Danchenko kóshesimen Rysqulov dańǵylyna qaraı burylǵanyn baıqaýǵa bolady.
«Áleýmettik jelide jarııalanǵan vıdeoǵa jaýap aıasynda quqyq buzýshy anyqtaldy. Ol basqa qaladan kelgen 22 jastaǵy azamat bolyp shyqty. Qarsy baǵyttaǵy qozǵalysqa arnalǵan qozǵalys bóliginen shyqqany úshin quqyq buzýshyǵa QR ÁQbK-niń 596-baby boıynsha ákimshilik is qozǵaldy. Júrgizýshige qatysty jınaqtalǵan materıal sheshim qabyldaý úshin qalalyq ákimshilik sotyna jiberildi. Ol kólik quralyn basqarý quqyǵynan aıyrylady» , – dedi Almaty qalalyq PD Jergilikti polıtsııa qyzmeti basqarmasynyń bastyǵy Manap Sattarov.
Spıkerdiń aıtýynsha, quqyq buzýshy qarsy kele jatqan jolaqqa shyǵýmen qatar, qıylysty baǵdarshamnyń tyıym salatyn belgisinen kesip ótken, memlekettik tirkeý nómirlik belgisi joq, qaýipsizdik beldiginsiz júrip, manevr jasap, apattyq jaǵdaılar týǵyzǵan. Quqyq buzýshyǵa 100 myń teńge ákimshilik aıyppul salyndy.
