Almatyda joldyń boıynda jylý trassasy jaryldy

ALMATY. QazAqparat- Almatyda Rysqulov pen Jansúgirov kósheleriniń qıylysynda ystyq sý qubyry jaryldy, dep habarlaıdy QazAqparat tilshisi.

Onyń vıdeosy áleýmettik jelide tarady.

«Aldyn ala málimet boıynsha, búgin tańerteń T. Rysqulov dańǵyly men І. Jansúgirov kóshesiniń qıylysyna jaqyn jerdegi ýchaskede jylý magıstrali jaryldy. Apat bolǵan jerde «Almaty jylý jelileri» JShS jedel toby jumys istep jatyr»,- dep habarlady kompanııadan.

Tutynýshylardy ystyq sýmen qamtamasyz etý jedel qalpyna keltirildi. Zardap shekkender joq.

Almaty qalalyq polıtsııa departamenti júrgizýshilerge apat bolǵan kósheni aınalyp ótýge keńes berdi.

«Jylý trassasynyń jarylýyna baılanysty, T. Rysqulov dańǵyly boıymen batys baǵytta І. Jansúgirov kóshesinen Rozovaıa kóshesine deıin kólik qozǵalysy jabyldy. Shekteý jol qalpyna kelgenshe kúshinde bolady. Qozǵalysqa qatysýshylardy aldyn ala baǵdaryn túzetip, jol qozǵalysy erejelerin qatań saqtaýǵa shaqyramyz»,- dep habarlady polıtsııadan.