Almatyda joldy sapasyz jóndegen alty kompanııa lıtsenzııasynan aıyryldy
ALMATY. QazAqparat - Almatyda qurylys jumystarynyń sapasyna baqylaý kúsheıtildi. Bul týraly onlaın brıfıng barysynda Qala qurylysyn baqylaý basqarmasy basshysynyń orynbasary Oljas Tólebaev málim etti, dep habarlaıdy QazAqpara tilshisi.
Onyń aıtýynsha, merdigerlerdi ǵımarattar men joldardy salý barysynda normalar men erejelerdi buzǵany úshin memlekettik lıtsenzııadan aıyrady. Qazirgi ýaqytta qala aýmaǵynda 664 qurylys nysany bar, onyń 202 bıýdjettik, 462 kommertsııalyq.
Qala qurylysyn baqylaý basqarmasynyń qyzmetkerleri júrgizgen tekserýler barysynda 1 112 buzýshylyq anyqtaldy, onyń ishinde sapa men tehnologııalardy saqtamaǵandar, jobalyq sheshimderden aýytqyǵandar sany - 208, jumys óndirisin sapasyz uıymdastyrǵandar – 854 jáne zańsyz qurylys júrgizgender sany – 50.
«Kemshilik jibergenderge qatysty jalpy somasy 207,8 mln teńgeniń 1 078 hattamasy toltyryldy. Olqylyqtardyń ornyn toltyrýǵa 183 nusqaý berildi, eskertýlerdi joımaǵan 103 nysan boıynsha materıaldar sotqa jiberildi», - dedi Oljas Tólebaev.
Bul rette qurylys sapasy boıynsha anyqtalǵan buzýshylyqtardyń negizgi bóligi bıýdjet esebinen salynyp jatqan nysandarǵa tıesili.
«Biz qurylys óndirisin uıymdastyrýda olqylyqtardy jıi anyqtaımyz. Mysaly, qorshaýlardy, jaıaý júrginshi tepkishekterin ornatý, qurylys materıaldaryn qoımalarǵa jınaý, sondaı-aq nysanda atqarýshy tehnıkalyq qujattardy rásimdeý kezinde, beton jumystary tehnologııasy, qaıta jabý, asfaltbeton jabynyn tóseý, jobalyq sheshimderdi buzý sııaqty óreskel olqylyqtardyń betin ashamyz», - dedi basqarma ókili.
Spıker 2021 jyly alty kompanııa lıtsenzııadan aıyrylǵanyn atap ótti.
«Jyl basynan beri alty kompanııa lıtsenzııasynan aıyryldy. Bul negizinen asfalttyń sapasynyń buzylýyna baılanysty: asfalttyń qalyńdyǵy talapqa saı emes, durys toltyrylmaǵan, jobadan bas tartylǵan. Tekserý jumystary jalǵasatyn bolady. Taǵy úsh merdigerdi lıtsenzııasynan aıyrý úshin materıaldar sotqa jiberildi», - dedi ol.
