Almatyda joldardy jóndeýge 7 mlrd teńge jumsalady
«Bıyl 250 myń sharshy metr jol óndelip, 97 myń sharshy metr trotýarlar men 130 beket alańdary qaıta jasalady. Jol- jóndeý jumystaryna jergilikti bıýdjetten 7 mlrd teńge, sonyń ishinde aǵymdaǵy jóndeý jumystaryna 1 mlrd teńge,trotýarlar men beket núktelerin jóndeýge 500 mln teńge, ortasha jóndeý jumystaryna 5,5 mlrd teńge bólindi», delingen habarlamada.
Sonymen qatar, qalalyq ákimdiktiń habarlaýynsha, qazirgi ýaqytta qala joldaryndaǵy aqaýlardy anyqtap, jóndeýge 20 brıgadasy bar tórt merdigerlik uıym bólingen. 
Almaty qalasynyń Jolaýshy kóligi jáne avtomobıl joldary basqarmasy habarlaǵandaı, qalada uzyndyǵy 31,27 shaqyrym bolatyn 12 magıstraldi jáne aýdandyq mańyzy bar 23 kóshelerge ortasha jóndeý jumystary júrgizilip jatyr. Sondaı-aq, uzyndyǵy 30,75 shaqyrym bolatyn 19 kóshege ortasha jóndeý jumystaryn júrgizýge memlekettik tapsyrys jarııalanǵan.
Jaqyn kúnderi Baıtursynov kóshesi, Tımırıazev kóshesinen Abaı dańǵylyna deıingi jol kúrdeli jóndeýden ótedi. Kúrdeli jóndeýden ózge bul ýchaskege «Almaty qalasynyń turaqty kóligi» baǵdarlamasy boıynsha qalanyń velosıped jáne júrginshi joly ınfraqurylymyn josparlaý negizinde velosıped joldarynyń qondyrǵylary ornatylady.
Jandosov kóshesi, Saıyn kóshesinen Taýsamaly eldi mekenine deıin uzyndyǵy 2,08 bolatyn aýmaq kúrdeli jóndeýden ótip jatyr. Jobada kólik qozǵalysy bóligin 4 jolaqqa deıin keńeıtý, «Qarǵaly» ózeniniń boıyndaǵy kópirdi qaıta jasaý, uzyndyǵy 2 km bolatyn velojol men uzyndyǵy 4 km bolatyn trotýarlar salý qarastyrylǵan.
Atap óterlik jaıt, bıylǵy jyly jalpy quny 574 mln teńge bolatyn 14,7 shaqyrym aryq jelisin salý, 57 kóshede 42,2 shaqyrym aryq jelisin qaıta jasaý josparlanǵan. Sonymen qatar, aýdandyq ákimdikterden uzyndyǵy 500 shaqyrym bolatyn 488 kóshege jańa aryq jeliler men nóser kanalızatsııalaryn salý úshin JSQ jasaý jóninde ótinishter túsken.