Almatyda joldan ótpek bolǵan 33 jastaǵy er adam kóz jumdy
ALMATY. Qazaqparat - Almatyda jaıaý júrginshini kólik qaǵyp, mert qyldy, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, jol apaty 12 qazan kúni tańǵy saǵat 04:10-da boldy.
«Mercedes Benz» avtokóliginiń júrgizýshisi Tashkent tasjolymen batys baǵytta kele jatyp, 16-K ǵımaratyna qarama-qarsy jerde jaıaý júrginshini qaǵyp ketti. Belgili bolǵandaı, 33 jastaǵy er adam tyıym salynǵan jerden joldy kesip ótpek bolǵan.
Apat saldarynan jaıaý júrginshi alǵan jaraqatynan oqıǵa ornynda kóz jumdy»,- dedi Almaty qalalyq Polıtsııa departamenti tergeý basqarmasynyń bastyǵy Oljas Sháripov.
Onyń aıtýynsha, Qylmystyq kodekstiń 345-baby 3-bóligi boıynsha sotqa deıingi tergeý bastaldy.
