Almatyda «Jolbarysty qutqarý» derekti fılminiń tusaýy kesildi
ALMATY. QazAqparat - Almaty kınoteatrlarynyń birinde «Oskar» syılyǵynyń ıegeri Ross Kaýfmannyń «Jolbarysty qutqarý» derekti fılminiń tusaýy kesildi, dep habarlaıdy «QazAqparat» HAA tilshisi.
Fılmniń túsirilimi jolbarystardy saqtaý jáne olardy kóbeıtý boıynsha belsendi jumystar júrgiziletin álemniń eń iri qorǵaýǵa alynǵan aımaqtarynda júrgizildi. Fılmniń basty keıipkerleri, sondaı-aq óz ómirlerin jolbarystardy qorǵaýǵa jáne zertteýge arnaǵan adamdar boldy.
Uıymdastyrýshylar atalǵan fılmniń Qazaqstan úshin de mańyzy zor ekenin atap ótedi.
Elimizde eki jyldan astam ýaqyt boıy jolbarystardy qaıta jersindirý jobasy belsendi júrgizilip otyr. Sonyń aıasynda kópten kútken 415 myń gektar jerdi qamtıtyn Іle-Balqash rezervaty paıda boldy. Ol óz kezeginde jolbarystardyń bolashaq popýlıatsııasy úshin óz úılerindeı bolmaq.
«Jolbarystardyń joıylyp ketý qaýpi tóngenine adamdardyń nazaryn aýdarǵymyz keledi. Bunyń qaýiptiligi bolashaqta ekologııalyq apattarǵa ákep soqtyrýy múmkin. «Jolbarysty qutqarý» jańa jobasy qoryq oryndary arqyly adamdardyń jolbarystardyń tolyǵymen joıylyp ketýine qalaı jol bergeni týraly suraqqa jaýap berip, búgingi tańdaǵy osy tańǵajaıyp janýarlardy qalaı qutqarýǵa tyrysatynyn kórsetý úshin uzaq saparǵa attanady», - dep atap ótti uıymdastyrýshylar.
Qazaqstandyq kórermen fılmniń tolyq nusqasyn 31 naýryz kúni Discovery Channel arnasynan kóre alady.
Avtory Elaman Turysbekov
