Almatyda jolaıryqtar qurylysy qarqyndy júrip jatyr
ALMATY. QazAqparat - Almatyda jol-kólik jelisin damytý jalǵasýda, dep habarlaıdy QazAqparat tilshisi.
Almatyda bıylǵy jyly keptelis júktemeleri kóp jol ýchaskelerinde salynyp jatqan úsh jolaıryqtyń qurylysy jalǵasýda.
Olar - Buqtyrma kóshesi men Qulja traktisiniń, Rysqulov dańǵyly men Emtsov kóshesiniń, Seıfýllın dańǵyly men Jansúgirov kóshesiniń boılarynda salynyp jatqan jolaıryqtar.
Rysqulov dańǵyly men Emtsov kóshesi boıyndaǵy jolaıryǵy kishi jol aınalymynyń quramyna enedi. Ol qalanyń soltústik bóligindegi kólik legin jeńildetedi.
Jyl sońyna deıin Buqtyrma kóshesi men Qulja trakti qıylysyndaǵy jolaıryǵynyń qurylysyn aıaqtaý josparda. Jolaıryǵyn paıdalanýǵa berý Túrksib aýdany men qala mańyndaǵy eldi mekenderdegi 350 myńǵa jýyq turǵynnyń mobıldiligin arttyrady.
Sonymen qatar, ortalyq bólikti qala shekarasymen baılanystyratyn negizgi kóshelerdi sozý jalǵasýda. Abaı dańǵylyn qala shekarasyna deıin sozý jumystary eki ýchaskede júrýde, Momyshuly dańǵylynan Áshimov kóshesine deıin jáne Áshimov kóshesinen qala shekarasyna deıin.
Sondaı-aq, Saın kóshesin Rysqulov dańǵylynan Móńke bı kóshesine deıin jáne Nurly kóshesin Sabdenov kóshesinen Raıymbek dańǵylyna deıin úńgileý jumystary júrgizilýde. Qonaev kóshesin (Jandosov kóshesiniń jalǵasy) ıAssaýı kóshesinen uzyndyǵy 1,2 shaqyrym bolatyn Áshimov kóshesine deıin rekonstrýktsııalaý jalǵasýda.
Bul nysandar iske qosylǵan kezde qala turǵyndarynyń mobıldiligi artady, megapolıstegi kóshe-jol qozǵalysynyń júktemesi azaıady.
