Almatyda jolaıryǵyn salý úshin súriletin turǵyn úıdiń 117 otbasyna ótemaqy tólendi
ALMATY. QazAqparat – Almatyda jol aıryǵyn salý úshin súriletin turǵyn úıde turatyn 117 otbasyna ótemaqy tólendi, dep habarlady QazAqparat tilshisi qala ákimdigine silteme jasap.
Birneshe jylǵa sozylǵan túıtkildi másele qala ákimi Baqytjan Saǵyntaevtyń aralasýynan keıin sheshildi.
Buzylýǵa jatatyn ýchaskelerdiń ıeleri Almaty qalasynyń ákimi Baqytjan Saǵyntaevqa Jetisý aýdanynyń turǵyndarymen kezdesý kezinde kómek surap, ótinish bildirgen edi.
Seıfýllın dańǵyly men Jansúgirov kóshesiniń qıylysyndaǵy jolaıryq respýblıkalyq bıýdjet esebinen salynyp jatyr. Qala ákimi Baqytjan Saǵyntaev 29 qazanda memleket basshysy Qasym-Jomart Toqaevtyń qatysýymen ótken keńeste jol aıryqtaryn salý úshin alynatyn ýchaskelerge ótemaqy tóleý máselesin kótergen bolatyn.
Almaty qalalyq jer qatynastary basqarmasynyń basshysy Ardaq Samambetovtiń aıtýynsha, Seıfýllın dańǵyly men Jansúgirov kóshesiniń qıylysynda jolaıryǵyn salý úshin ondaǵy jerdi satyp alý máselesi 2017 jyldan beri sheshilmeı kelgen. Qarasha aıynda respýblıkalyq bıýdjetten 3,5 mlrd. teńge kóleminde qarajat bólinip, 117 ýchaskeniń ıelerine ótemaqy tóleý protsesi bastaldy. Búginde olardyń barlyǵy tıisti somasyn aldy.
«Osy kúnge deıin turǵyndardyń jaǵdaıy belgisiz bop keldi. Olar bul jerdi ne sata almaıdy, ne kete almaıdy. Qala ákimi Baqytjan Saǵyntaevtyń arqasynda másele sheshimin tapty. Buzylýǵa jatatyn úılerdiń ıelerimen kóshýdiń qalaı júrgiziletinin talqyladyq», — dedi Almaty jer qatynastary basqarmasynyń basshysy Ardaq Samambetov.
Jylytý maýsymy men aldaǵy merekelerge baılanysty turǵyndarǵa kelesi jyldyń basynda kóshýge ruqsat berildi.
Seıfýllın dańǵyly men Jansúgirov kóshesiniń qıylysyndaǵy jol aıryǵynyń qurylysy osy ýchaskedegi kólik júktemesin tómendetý maqsatynda júrgizilýde.
