Almatyda jolaı ótken adamdardy pyshaqpen qorqytyp tonap kelgen 4 jas jigit ustaldy
ALMATY. QazAqparat- Almatyda adamdardy uryp-soǵyp, tonaǵandar ustaldy. Qazir atalǵan fakti boıynsha, tórt azamat kúdikti retinde tergelip jatyr. 17 jáne 19 jastaǵy jigitter qamaýǵa alyndy, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, jas jigitter qylmysty kisi kóp jınalatyn oryndar men saıaqbaqta jasaǵan.
«Kúdikti retinde 17 jastaǵy D. esimdi azamat, J. esimdi azamat, N. esimdi azamat jáne 19 jastaǵy B. esimdi azamat ustaldy. Olar zańsyz baıý maqsatynda ótip bara jatqan adamdardy pyshaqpen qorqytyp, uryp-soǵyp, uıaly telefondary men basqa da múlikterin tartyp alǵan. Tórt jigit saıabaq pen halyq kóp jınalatyn jerlerde júrgen. Olar qorǵansyz azamattarǵa túngi ýaqytta ǵana shabýyl jasaǵan. Atalǵan tulǵalar ustalyp, qaraqshylyq shabýyl jasaǵanyn moıyndady», – deıdi Medeý aýdandyq polıtsııa basqarmasynyń bastyǵy Dáýren Ótebaev.
Polıtsııa ókiliniń aıtýynsha, qazirgi ýaqytta ustalǵandardyń jalpy Almaty qalasynda osyǵan uqsas, buryn jasalǵan qylmystarǵa qatysy bar-joǵy tekserilip jatyr.
Tártip saqshylary kúdiktilerdiń qylmystyq áreketinen zardap shekken azamattardyń Medeý aýdandyq PB-ǵa habarlasýyn suraıdy: 8 (727) 254-48-02; 8-702-476-66-60.
