Almatyda jolaýshylar jolaqyny mobıldi qosymsha arqyly tóleıtin boldy
ALMATY. QazAqparat - Almatyda qoǵamdyq kólik jolaýshylaryna arnalǵan «Ońaı» tólem júıesi óz múmkindigin keńeıtti, dep habarlaıdy QazAqparat tilshisi.
Karta júıesindegi jańalyqtarmen «Ońaı Raý» kompanııasynyń dırektory Aleksandr Zaıkın bólisti.
Onyń aıtýynsha, jaqyn arada Ońaı ıegerleri jolaqysyn mobıldi qosymsha arqyly tóleıtin bolady
«Bul másele birneshe aı ýaqyt alady. Bul jańalyq kartasyn úıinde umytyp ketken adamdar úshin tıimdi bolady. Sonymen qatar, jaqyn arada vırtýaldy karta jasap, paıdalanýǵa engizemiz. ıAǵnı, adamdarǵa plastık karta satyp alýdyń qajettiligi bolmaıdy», - dedi «Ońaı Raý» dırektory Aleksandr Zaıkın.
Búginde «Ońaı» qosymshasy arqyly tek kartany tolyqtyryp qana qoımaı, qoǵamdyq kóliktiń qozǵalysyn baqylaýǵa bolady. Sonymen qatar, karta kınoǵa bılet satyp alýǵa múmkindik beredi.
«Biz bıletterdiń onlaın satylymy servısterimen, onlaın apteka servısterimen áriptestik ornattyq. Atalǵan servıster arqyly dári-dármek nemese bılet satyp alyp, Ońaı kartasymen eseptesýge bolady», - dedi ol.
Qazaqstandyq mamandar tájirıbeni gonkongtyq Octopus smart kartasy júıesinen alǵan.
«Qazir Octopus smart kartasy arqyly birqatar qyzmetke tólem jasaýǵa bolady. Onyń ishinde kólik, turaq, sýpermarkette saýda, taksı, qyzmetter men taýarlar satyp alýǵa bolady», - dedi A.Zaıkın.
Qazirdiń ózinde Ońaı kartasy arqyly «Medeý» jáne «Shymbulaq» taý shańǵysy, «Kók-Tóbe» parkiniń kassalarynda, zoobaq pen delfınarııge Ońaı kartasy arqyly tólem jasap kirýge bolady.
Aıta ketý kerek, Ońaı biryńǵaı tólem júıesi 2015 jyldyń 1 qazanynan bastap paıdalanýǵa engizilgen.
3 jylda 1,8 mln karta shyǵarylǵan. Kún saıyn 1 mln-ǵa jýyq adam atalǵan qyzmetti paıdalanady.
