Almatyda jolaýshylar avtobýs qozǵalysyn elektrondy tablodan kóretin bolady
ALMATY. Qazaqparat - Almaty aıaldamalarynda jyl sońyna deıin alǵashqy elektrondy tablo paıda bolady, dep habarlaıdy Qazaqparat tilshisi.
Elektrondy tablolarda qoǵamdyq kólik qozǵalysynyń kestesi kórsetiletin bolady.
«Ákimdik aıaldamalarǵa tsıfrly tablolar ornatýǵa qarsy emes. Munda olardy qala bıýdjetinen tys qarjy esebinen ornatý týraly aıtyldy. Alǵashqy tablo Tımırıazev kóshesi boıyndaǵy BRT jelisinde jyl sońyna deıin paıda bolady. Bul isti Almaty Kólik holdıngi óz moınyna alyp otyr. Qala ákiminiń tapsyrmasyna oraı biz bul isti bıýdjetten tys qarjy esebinen jasaımyz jáne qalanyń iri toraptyq aıaldamalaryn tsıfrly tablolarmen qamtamasyz etemiz», - dedi Jolaýshylar kóligi jáne avtomobıl joldary basqarmasynyń basshysy Talǵat Hoschanov.
Onyń aıtýynsha, 200 myńnan astam tutynýshy onlaın-rejımde karta boıynsha kólik qozǵalysyn «Ońaı» qosymshasyndaǵy QR-kody arqyly bilip otyrady.
360 myń belsendi qoldanýshy CityBus qosymshasyn paıdalanady.
Jyl aıaǵyna deıin ár aıaldamaǵa qoǵamdyq kólik baǵytynyń nómiri, jumys ýaqyty kórsetilgen aqparat ornalastyrylady.
Aıta ketý kerek, jyl sońyna deıin Almatyda jańa qoǵamdyq kóliktiń úlesi 87 paıyzǵa deıin jetetin bolady. Ótken aptada qalaǵa taǵy 200 jańa avtobýs keldi.
«Eski ári tútin shyǵaratyn avtobýstar qalada júrmeýi kerek. Eger kórsetilgen qoldaýǵa qaramastan jeke tasymaldaýshy jyljymaly sostavty jańalamasa, onda olarmen kelisim buzylady. Jańa tehnologııalardy engizip, bolashaqta bir kólikten ekinshisine tegin aýysýdy qarastyrǵan jón. Jolaýshylardyń kólik jumysyna qanaǵattanýy - tasymaldaýdyń basty krıterııi. Jeke kólikti qazirgi deńgeıde ustap turý úshin laıyqty balama usyný qajet», - dedi ákim Baýyrjan Baıbek.
