Almatyda jol jóndeý jumysy ýaqytsha toqtatyldy
ALMATY. QazAqparat - Almatyda aýa raıynyń qolaısyzdyǵyna baılanysty jol jóndeý jumysy ýaqytsha toqtatyldy, dep habarlaıdy QazAqparat tilshisi.
«Aýa raıynyń qolaısyzdyǵyna baılanysty 21 sáýirde joldardy jóndeý jumystary ýaqytsha toqtatyldy», - dep habarlady Almaty qalalyq mobıldilik basqarmasynan.
Aıta keteıik, sáýir aıynyń basynan bastap qala kóshelerinde jóndeý bastaldy. Osy ýaqytqa deıin joldaǵy 4 myńǵa jýyq oıyq-shuńqyr biteldi.
Kúndelikti jóndeý jumysyna 400-den astam jumysshy men 155 arnaıy tehnıka jumyldyrylady. Almatynyń 256 kóshesine jóndeý josparlanǵan.
Jalpy, Almaty qalasynda kóshe-jol jelisiniń uzyndyǵy 3 096,8 shaqyrym, kóshe sany - 2 746. Onyń ishinde magıstraldy mańyzy bar kóshe sany - 385, olardyń uzyndyǵy 1 150 shaqyrym. Jergilikti mańyzy bar kóshe sany - 2361, olardyń uzyndyǵy 1 946,8 shaqyrym.
