Almatyda jol tártibin buzǵan 43 avtokólik aıyppul turaǵyna jetkizildi

Almaty qalasy polıtsııa departamentiniń málimetinshe, tek bir tún ishinde mamandandyrylǵan polıtsııa ákimshiligi basqarmasynyń batalony avtokólikti mas kúıinde júrgizgeni úshin - 4 hattama, tirkeý nómirsiz kólik júrgizgeni úshin - 8 hattama toltyrdy. Túngi jumystardyń basty maqsaty - jol tártibin óreskel buzý faktilerin anyqtaý.

«Qalada kúndelikti jol tártibi buzylady. Keıde onyń sońy ólimmen de aıaqtalady. Ókinishke qaraı, keı júrgizýshilerdiń mádenıeti men jaýapkershiligi kóńilge qaıaý túsiredi. Ár adam óziniń jáne qoǵamnyń qaýipsizdigin oılap, sol úshin ózi jaýap beretinin bilýi tıis. Osyndaı reıdter qarqyndy túrde, jol erejeleriniń buzylmaıtynyna kózimiz jetkenshe júrgiziletin bolady», - dedi qalalyq polıtsııa.

Jol tártibin jıi buzatyndar arasynda jol syzyqtaryn kesip, apattyq jaǵdaı týǵyzatyndar bar. Sonyń nátıjesinde jalpy sany 43 avtokólik aıyppul turaǵyna jetkizilgen.

Aıtalyq, ál-Farabı dańǵylynda kóliginiń barlyq terezesin qarańǵylap alǵan «Folksvagen Passat» kóligi kózge tústi. Qujattaryn tekserý barysynda júrgizýshi terezelerin nege qarańǵylaǵanyn túsindire almady. Sol jerde tártip buzýshyǵa aıyppul salynyp, ákimshilik hattama toltyryldy.

Sondaı-aq, ekıpaj manevr jasap, tártip buzǵany úshin «Toıota Kamrı» avtokóligin toqtatty. Júrgizýshi bir qatardan ekinshi qatarǵa burylys kórsetkishterin qospaı, beıbereket aýysyp otyrdy. Al tún jarymynda ınspektorlar mas júrgizýshini toqtatty. Aıaǵyn áreń basyp turǵan jigitti polıtseıler medıtsınalyq saraptamadan ótkizýge alyp ketti. Narkolog dárigerdiń aıtýynsha, ol orta dárejede mas bolǵan. Avtokólik arnaıy aıyppul turaǵyna jetkizilip, júrgizýshi ákimshilik jaýapkershilikke tartyldy. Sot sheshimimen ony kólik júrgizý quqyǵynan aıyrý jazasy kútip tur.

Almaty qalasy polıtsııa departamentiniń habarlaýynsha, bul jumystar birinshi kezekte jol apattarynyń aldyn alý men joldaǵy qaýipsizdikti nyǵaıtýǵa baǵyttalǵan.

Elaman Turysbekov